Safnar fyrir málsókn vegna flugslyss föður

„Ég hef fundið mikinn stuðning frá fólki á Íslandi sem trúir á málstað okkar,“ segir Sarah Wagstaff, dóttir Grants Wagstaff sem lést í flugslysi á Íslandi.

Beaver flugvélin N610LC fórst 9. ágúst 2015, um 45 mínútum eftir flugtak frá Akureyri. Grant Wagstaff sem til stóð að myndi ferja vélina til Bandaríkjanna lifði af en komst ekki úr flakinu og lést af völdum elds. Arngrímur Jóhannsson, eigandi flugvélarinnar og flugmaður þennan dag, slasaðist.

Sarah og systkini hennar eru ekki efnuð. Fyrir nokkrum vikum efndi hún til söfnunar á vefsíðunni gofundme.com til að standa straum af kostnaði þeirra vegna reksturs málsins fyrir dómstólum á Íslandi. Hún hyggst stefna Sjóvá sem neitar að greiða bætur og kveðst jafnframt líklega munu stefna Arngrími. Safnast höfðu 1.250 dalir í gær.

„Við vonumst til að safna 50 þúsund kanadískum dollurum fyrir ferða og lögmannskostnaði,“ segir Sarah sem kveðst virkilega vonast til að komast til Íslands vegna málsins. „Ég hef ekki haft tök á að fara að slysstaðnum til að kveðja föður minn svo ég er að vonast til þess að geta gert það þegar ég kem til að fylgjast með réttarhöldunum. Mig langar líka að geta komið upp minnismerki um föður minn á staðnum sem hann lést.“

Sarah segir að lögmaður Roslyn móður hennar hjá Opus lögmönnum hafi þegar stefnt Sjóvá og Arngrími. Sarah og systkini annars vegar og móðir þeirra hins vegar reka aðskilin mál, meðal annars vegna þess að Sarah telur að lögmannsstofan Opus hafi sýnt af sér vanrækslu við rekstur málsins.

Sem fyrr segir kveðst Sarah hafa fundið mikinn stuðning frá Íslandi. „Margir lýsa þeirri skoðun að Opus hafi farið illa með málið og þetta styrkir mig í þeirri trú að við séum á réttri leið,“ segir Sarah.

Að því er Sarah segir fékk móðir hennar samþykkta gjafsókn frá íslenska ríkinu. Lögmaður systkinanna á Íslandi hefur slíka umsókn í undirbúningi vegna málareksturs þeirra. Það muni ekki skýrast fyrr en eftir nokkra mánuði hvort þau fái einnig gjafsókn. „Ég vonast til að geta stefnt Opus fyrir vanrækslu og Sjóvá til greiðslu bóta,“ segir hún.

Aðspurð hvað verði um söfnunarfé frá gofundme.com ef gjafsóknin fæst segir hún gjafsóknarpeningana ekki duga fyrir öllum kostnaði þeirra systkina vegna málsins.

„Peningunum verður varið til að koma fjölskyldunni til Íslands til að vera viðstödd dómsmálið og hugsanlega vegna lögmannskostnaðar í Bandaríkjunum þar sem enn er verið að skoða hvort grundvöllur sé til málsóknar í ljósi þess að flugvélin var skráð sem eign sjóðs í umsjón Wells Fargo bankans,“ segir Sarah Wagstaff.