Morata: Chelsea ætlaði að gera mig að dýrasta spænska leikmanni allra tíma

Álvaro Morata, framherji Real Madrid, segir að Chelsea hafi gert risatilboð í sig í sumar.

Real Madrid keypti Morata til baka frá Juventus í sumar fyrir 34 milljónir punda en hann var í tvö ár hjá ítalska stórliðinu. Morata segir að Chelsea hafi einnig borið víurnar í hann.

„Chelsea sýndi mér mestan áhuga. Antonio Conte hafði áður keypt mig til Juventus,“ sagði hinn 23 ára gamli Morata sem skoraði þrjú mörk fyrir Spánverja á EM í Frakklandi í sumar.

„Þetta var mjög gott tilboð. Ég hefði orðið dýrasti spænski leikmaðurinn í sögunni,“ bætti Morata við en talið er að tilboð Chelsea hafi hljóðað upp á um 60 milljónir punda.

Morata skoraði 27 mörk í 93 leikjum fyrir Juventus og varð tvisvar ítalskur meistari með liðinu. Juventus komst einnig í úrslitaleik Meistaradeildarinnar vorið 2015 en Morata skoraði mark liðsins í 3-1 tapi fyrir Barcelona.