Veðurstofan varaði Almannavarnir við hálfum degi fyrir upphaf goss

Eldgosið hófst laust fyrir miðnætti laugardagskvöldið 20. mars og það vakti athygli að hvorki Veðurstofan né Almannavarnir virtust hafa hugmynd um hvað væri að gerast fyrr en íbúi í Múlakoti í Fljótshlíð tilkynnti um eldbjarma yfir Eyjafjallajökli, en þá er talið að gosið hafi verið búið að standa yfir í um hálftíma.

Veðurstofan virðist þó hafa haft enhverjar meiri vísbendingar um aðdraganda gossins því að í greinagerð, sem nú hefur verið birt á heimasíðu Veðurstofunnar, er upplýst að þá um morguninn, um hálfum sólarhring fyrir upphaf gossins, hafi Veðurstofan tilkynnt Almannavörnum um verulega grynnri skjálftavirkni.

Víðir Reynisson, deildarstjóri Almannavarna hjá Ríkislögreglustjóra, var spurður hvort ekki hafi verið ástæða til að senda þá út tilkynningu til almennings. Víðir segir að almannavarnir hafi ekki talið ástæðu til þess. Þá hafi svokallað óvissustig búið að vera í gildi um talsverðan tíma, en það sé fyrsta viðbúnaðarstig. Ef grípa hefði átt til frekari aðgerða hefði rýming verið næsta skrefið.

„Okkur fannst að það væru ekki nógu sterkar líkur til þess að gos væri að hefjast þarna um hádegið á laugardeginum til þess að við vildum rýma allt svæðið," segir Víðir.

Spurður hvort ekki hefði verið ástæða til að láta almenning vita í gegnum fjölmiðla svarar Víðir að stöðugt hefði verið látið vita af því, með reglulegum tilkynningum, að þarna væri óvissustig. Fólk hafi verið mjög upplýst og íbúafundir hafi verið á svæðinu dagana á undan, á miðvikudegi og fimmtudegi, þannig að fólk hafi verið mjög vel upplýst um hvað þarna væri á seyði.