Tíðindalaust af gosstöðvunum

Kvikustreymi og gosmökkur frá eldgosinu í Eyjafjallajökli hefur verið með svipuðum hætti og undanfarna sólarhringa og hraun heldur áfram að renna til norðurs í upptökum Gígjökuls. Í minnisblaði frá Veðurstofu Íslands og Jarðvísindastofnun Háskóla Íslands segir að ekki sjáist merki um að gosi sé að ljúka, þó að virkni á yfirborði sé minni en þegar mest lét.

TF-SIF flugvél Landhelgisgæslunnar fór í könnunarflug að gosstöðvunum í dag en ekkert sást til gossins. Ratsjá vélarinnar greindi þó að gígurinn er orðinn um 200 metrar í þvermál og um 150 metrar á hæð.

Gosórói er svipaður og undanfarna daga og engin merki sjást um breytingar undir Kötlu.