Eriksson hentar Real Madrid vel

Danski harðjaxlinn Thomas Gravesen segir að Sven-Göran Eriksson væri kjörinn í að taka við stjórn Real Madrid þegar hann lætur af störfum sem landsliðsþjálfari Englendinga eftir HM í sumar. Forráðamenn Real Madrid eru nú að leita sér að góðum knattspyrnustjóra og er nafn Eriksson eitt þeirra sem oftast hefur verið nefnt til sögunnar að undanförnu.

"Eriksson er með mjög gott orð á sér og maður sem hefur stýrt Lazio og enska landsliðinu er auðvitað enginn nýgræðingur. Það verður engu að síður gríðarleg pressa á honum í sumar að ná góðum árangri með enska landsliðið," sagði sá danski, sem hefur fullan hug á að vera áfram í Madrid ef félagið hefur áhuga á að halda honum.