Heiða greinir frá morð­hótunum

„Ég bara vona að næsti borgarstjóri þurfi ekki að fara í gegnum svona allskonar elda eins og síðustu borgarstjórar hafa þurft að fara í gegnum og ég held að við sem þjóð þurfum líka aðeins að velta fyrir okkur hvernig við tölum um kjörna fulltrúa,“ segir Heiða Björg sem ræddi við fréttastofu að loknum síðasta borgarstjórnarfundi kjörtímabilsins í dag.

Hugsar til næstu kynslóð stjórnmálamanna

Heiða segir að það hafi verið mikill heiður að hafa fengið traustið að gegna stöðu borgarstjóra. Hún segist telja fráfarandi meirihluta hafa áorkað miklu á stuttum tíma og nýtt tímann töluvert betur heldur en meirihlutinn þar á undan. Gengið hefur á ýmsu þann tíma sem Heiða hefur verið borgarstjóri og segist hún hafa fundið fyrir því.

„Það er náttúrulega gríðarlegur heiður að fá að vera kjörinn fulltrúi og það er ofboðslega skemmtilegt og fólk treystir manni fyrir sögum sínum og úrlausnum á flóknum málum en það er líka stundum erfitt að standa í eldlínunni þegar spjótin beinast að þér og við höfum séð mörg slæm dæmi um það, kannski mörg verri en það sem ég hef lent í en þó. Á þessu eina og hálfa ári hefur maður fengið morðhótanir og allskonar fólk sem er á eftir manni og það er kannski ekki það sem manni langar til að fólk þurfi að upplifa sem tekur þetta að sér. Því að lýðræðið náttúrulega virkar þannig að við þurfum öll að geta boðið okkur fram og vera tilbúin til að hlaupa í einhvern tíma og svo tekur einhver annar við og öll erum við bara að vinna að þessu fyrir samfélagið.“

Hefur þú þurft að þola morðhótanir?

„Ég hef fengið allskonar hótanir já þetta tímabil og það hefur gengið á ýmsu. En ég er bara þakklát fyrir að fá að gegna þessu og hef tekið það á mig en maður hugsar um næstu kynslóð stjórnmálamanna, ég vona að við berum aðeins meiri virðingu fyrir því að fólk er að helga sig þessu í einhvern ákveðinn tíma og það krefst bæði vinnu og orku en líka mikils af fjölskyldu og við þurfum kannski að temja okkur að tala fallegra bara almennt um fólk.“

Þurftirðu að fá lífvörð þegar þær komu, þessar morðhótanir?

„Já ég hef verið með á tímabilum aukna gæslu og ég veit að fleiri borgarstjórar hafa fengið það líka.“

Býst við góðu samstarfi við samflokksmenn og nýjan meirihluta

Heiða segist ætla að sitja áfram sem borgarfulltrúi. Það sé margt sem hana langi til að klára í borginni, hún brenni fyrir samfélaginu. Það sé margt eftir. Hún segist eiga von á því að eiga í góðu samstarfi við Pétur Marteinsson oddvita síns eigin flokks.

„Við tókumst auðvitað á í prófkjöri þannig það er eðlilegt en við höfum átt fínt samstarf það sem af er og ég hlakka til að sjá þennan nýja borgarstjórnarflokk Samfylkingarinnar. Það eru auðvitað miklar breytingar í borgarstjórn, hjá Samfylkingunni og öllum öðrum. Við erum tvö sem höldum áfram og þrjú sem koma ný inn og í dag erum við að kveðja hérna sextán borgarfulltrúa sem eru að hverfa til annarra starfa og svo koma sextán nýir í næstu viku, þannig þetta verður bara spennandi.“

Hvernig líst þér á væntanlegan meirihluta, hann verður væntanlega inn á miðju eða mjög mikið til hægri miðað við vendingar?

„Já út frá minni pólitísku sýn er ég miðju, vinstrikona og vill nú helst að við horfum nú alltaf á heildina og tökum ábyrgð hvert á öðru, en ég vona bara að hér komi öflugur meirihluti sem gerir góð verk og ég er bara tilbúin til að starfa með þeim að þeim verkum og veita þeim aðhald ef þau ætla að fara í einhverjar vitlausar áttir. En mér finnst mikilvægt að virða niðurstöðurnar, þetta er lýðræðislega kosinn meirihluti og ég mun styðja þann borgarstjóra í því sem ég get.“