Innlent

Vilja sinna lög­gæslu í Gríms­ey og Hrís­ey með drónum

Kjartan Kjartansson skrifar
Þorpið á Grímsey. Lögregla er ekki með fasta viðveru þar og skoðar nú möguleikann að láta fjarstýrða dróna vakta eyjuna úr lofti.
Þorpið á Grímsey. Lögregla er ekki með fasta viðveru þar og skoðar nú möguleikann að láta fjarstýrða dróna vakta eyjuna úr lofti. Egill Aðalsteinsson

Lögreglan á Norðurlandi eystra hefur hug á því að setja upp dróna í Hrísey og Grímsey til þess að sinna löggæslu. Drónar eru sagðir geta nýst vel á svo einangruðum stöðum þar sem löggæsla er ekki til staðar árið um kring.

Bæjarráð Akureyrarbæjar tók erindi frá Páleyju Borgþórsdóttur, lögreglustjóra á Norðurlandi eystra, um drónana til skoðunar í síðustu viku. Lögreglustjórinn óskaði eftir því að bærinn taki þátt í verkefninu með því að kaupa flygildin.

Áætlaður kostnaður er metinn á 3,7 milljónir króna á hvorri eyju, alls 7,4 milljónir króna í heildina. Inni í þeim kostnaði eru kaup á drónunum, leyfisgjöld fyrir hugbúnað og 4G-sendingarbúnaður.

Lögreglustjórinn telur löggæsludróna sem sé fjarstýrt frá lögreglustöðvum gagnlega viðbót við löggæslumyndavélakerfið. Ef ráðist yrði í drónaverkefnið í Hrísey og Grímsey yrði fallið frá fyrir hugmyndum um að koma þar fyrir föstum löggæslumyndavélum.

Tveir löggæsludrónar eru fyrir á Akureyri  sem hluti af tilraunaverkefni sem bæjarráð samþykkti að taka þátt í síðasta haust. Lögreglustjórinn segir góða reynslu komna á notkun drónanna sem fyrsta viðbragð.

Bæjarráð vísaði erindi lögreglustjórans um dróna í eyjunum tveimur til bæjarstjóra til áframhaldandi meðferðar.

Akureyri Grímsey Hrísey Lögreglan Flug

Tengdar fréttir

Hyggst gera til­raun með lög­reglu­dróna í héraði

Lögreglustjórinn á Norðurlandi eystra hyggst ráðast tilraunaverkefni til tveggja ára þar sem drónar verða notaðir og sendir á vettvang á stöðum í umdæminu þar sem löggæsla er ekki mönnuð allan sólarhringinn.

Mest lesið


Fleiri fréttir

Sjá meira


×

Mest lesið