Páskaeggja-„hefðinni“ var komið á í Covid

Þetta sýnir svo ekki verður um villst að því sem eitt sinn hefur verið komið á verður ekki svo glatt aflagt. Fjölmargir innan spítalans firrtust þó við þegar tíðindi af þessu bárust. Meðal þeirra var Ragnar Freyr Ingvarsson, sem bæði starfar sem sjálfstætt starfandi læknir og inni á Landspítalanum, furðaði sig á forgangsröðuninni en niðurskurðarkrafa var ástæða þess að spítalinn vildi hætta að gefa páskaegg.

Fréttaflutningur af þessu leiddi svo til þess að Góa og Omnom stukku til og gáfu samtals rúmlega sjö þúsund egg til spítalans. Hann sat því eftir sem áður uppi með þann höfuðverk að dreifa eggjunum en það er hægara sagt en gert. Eftir því sem Vísir kemst næst hefur þó gengið vel að koma eggjunum út þó að yfirstjórnin í Skaftahlíðinni hafi að þessu sinni sagt pass. En samkvæmt fyrstu upplýsingum voru eggin sex þúsund ætluð sjö þúsund starfsmönnum. Það hefur svo verið leiðrétt.

Viðbrögð við fréttum Vísis af stóra páskaeggjamálinu, en sá fréttaflutningur teygði sig víða, varð til þess að fjölmargar ábendingar og fyrirspurnir bárust fréttastofu. Ein þeirra er frá Guðjóni Sigurðssyni sem er formaður MND á Íslandi. Hann segir fréttina hljóma eins og starfsmenn LSH hafi fengið páskaegg frá örófi alda en það kemur honum spánskt fyrir sjónir.

„Við hjá MND á Íslandi höfum í mörg ár gefið starfsfólki taugalækningadeildar og MND-teymisins páskaegg, vegna þess að starfsmenn hafa ekki fengið þau frá LSH. Sama gildir með jólagjafir sem við höfum fært „okkar“ fólki. Litlar gjafir en meira svona táknrænn þakklætisvottur,” segir Guðjón og hann spyr: Hvenær byrjaði LSH að gefa starfsmönnum páskaegg og hvenær var þetta svo skorið af?

Guðjóni þykir þetta kúnstugt en svarið er sem sagt að það að spítalinn hóf fyrst að gefa starfsfólki páskaegg í Covid.