Kjartan Atli leiðir Samfylkinguna í Garðabæ

Oddur Ævar Gunnarsson skrifar 16. mars 2026 18:36

Efstu sex frambjóðendurnir á lista Samfylkingarinnar í Garðabæ.

Kjartan Atli Kjartansson fjölmiðlamaður og þjálfari leiðir framboðslista Samfylkingarinnar í Garðabæ. Listinn var samþykktur á fjölmennum félagsfundi nú fyrir stundu.

Þetta kemur fram í tilkynningu. Þar segir jafnframt að Vilborg Anna Strange Garðarsdóttir fjármála-og rekstrarstjóri verði í öðru sæti listans og Rakel Margrét Viggósdóttir kennari og deildarstjóri í því þriðja.

„Þessi hugmynd, að ég myndi leiða Samfylkinguna í Garðabæ, kom upp fyrr á þessu ári. Strax á fyrsta fundi fann ég hvað fólkið í flokknum hefur mikinn metnað fyrir Garðabæ. Óhætt er að segja að ég geri slíkt hið sama,“ er haft eftir Kjartani Atla í tilkynningunni.

„Það er að sjálfsögðu mikill heiður að fá að vera í stafninum og leiða þessa mögnuðu liðsheild. Listinn hefur á að skipa frábærri blöndu af kraftinum sem fylgir nýju fólki í stjórnmálum og reynslu þeirra sem þekkja pólitíkina, en á listanum má finna fyrrum ráðherra, bæjarstjóra og bæjarfulltrúa í fleirtölu. Við erum með sterka tengingu við skólakerfið í bænum, íþróttastarfið og byggðarkjarnana þrjá.“

Hann segir jafnframt að framboðið muni á næstu vikum kynna stefnumál sín fyrir bæjarbúum. Lögð verði áhersla á skynsemi og metnaðarfulla nálgun í að bæta nærumhverfið. Frambjóðendum þyki vænt um Garðabæ.

Vilmar Pétursson, sérfræðingur hjá Vinnumálastofnun, er í fjórða sæti listans og hinn 23 ára Ögmundur Árni Sveinsson í því fimmta, en viðskiptafræðineminn Ögmundur er innfæddur Garðbæingur sem hefur þjálfað börn og unglinga bæjarins í körfubolta við einstaklega góðan orðstír. Í sjötta sætinu er Katrín Júlíusdóttir, fyrrum fjármálaráðherra og iðnaðar- og nýsköpunarráðherra.

Listinn í heild sinni:

1. Kjartan Atli Kjartansson, stjórnmálafræðingur, fjölmiðlamaður, þjálfari og rithöfundur

2. Vilborg Anna Strange Garðarsdóttir, fjármála- og rekstrarstjóri

3. Rakel Margrét Viggósdóttir, kennari og deildarstjóri

4. Vilmar Pétursson, sérfræðingur hjá Vinnumálastofnun

5. Ögmundur Árni Sveinsson, viðskiptafræðinemi og þjálfari

6. Katrín Júlíusdóttir, f.v. ráðherra, ráðgjafi og rithöfundur

7. Rósanna Andrésdóttir, grunnskólakennari og alþjóðafræðingur

8. Bjarni Thor Kristinsson, óperusöngvari, menningarstjórnandi og leikstjóri

9. Guðfinna Guðmundsdóttir, f.v. bæjarfulltrúi , matreiðslumeistari og menntunarfræðingur

10.Ragnheiður Hergeirsdóttir, f.v. bæjarstjóri, félagsráðgjafi og lektor við H.Í.

11.Freyja Kvaran, stjórnmálafræðinemi