Hola í vegi tók fjóra bíla úr um­ferð á van­ræktum vegkafla

Aron Þór Hermansson, umsjónarmaður fasteigna, segir frá því í samtali við Vísi að fjórir ökumenn, þar á meðal hann sjálfur, hafi ekið í stóra holu er þeir keyrðu Elliðavatnsveg í Hafnarfirði í morgun, nánar tiltekið nálægt leikskólanum Hlíðarenda.

„Það voru fjórir bílar þarna í röð sem lentu allir í [holunni],“ segir Aron í samtali við Vísi. Atvikið hafi átt sér stað í myrkri og við lélega lýsingu, þar sem engir ljósastaurar væru á svæðinu.

Og allir ökumenn virðast hafa lent í sama tjóni og Aron, hvort sem um væri að ræða Land Rover eða Volkswagen Golf. 

„Þetta er jafnvel sama dekkið sem skemmist, framdekkið bílstjóramegin,“ segir hann og tekur fram að hann hafi sjálfur hafa verið á um 30 til 40 km/klst hraða en að 50 km/klst hámarkshraði sé á veginum.

Dráttarbílar voru kallaðir til að fjarlægja bílana og sjálfur þruft Aron að punga út 70 þúsund krónum vegna tjónsins, segir hann. Auk þess hafi felgan skemmst og Aron grunar að bíllinn sé einnig orðinn hjólaskakkur.

Vanræktur vegur

Eftir atvikið hafi aðeins versta holan verið fyllt, en aðrar slæmar holur í nágrenninu hafi verið skildar eftir ósnertar.

„Þetta sýnir hvað er verið að vanrækja þennan veg. Þeir rétt svo fylla upp í það alversta. Þetta er orðið hættulegt. Þessi vegur er gerður fyrir fimmtíu kílómetra hraða,“ segir Aron.

Ökumaðurinn bendir á að Elliðavatnsvegur sé mikið notaður, sérstaklega af íbúum í Hafnarfirði, en að ástand hans sé skelfilegt og handónýtt. Þá bendir Aron á að bæjaryfirvöld í Garðabæ hyggist tengja nýtt hverfi í Urriðaholti við veginn og setja upp hringtorg, sem mun væntanlega auka álag á veginn.

Hafnarfjarðarbær ábyrgist þennan kafla vegarins en Aron segir að Vegagerðin beri ábyrgð á restinni af veginum og að viðhaldi hafi almennt verið ábótavant. 

Hann hafi nú sjálfur haft samband við Garðabæ, Hafnarfjarðarbæ og Vegagerðina til að leita svara en auk þess undirbýr hann nú bótakröfu á hendur annaðhvort Hafnarfjarðarbæ eða Vegagerðinni enda hafi hann og fleiri þurft að greiða fyrir tjónið sem varð á bílunum.