Hljóp upp í fjall eftir á­rekstur og neitaði að koma niður

Umferðarslysið átti sér stað upp úr hádegi í dag. Ökumaðurinn hljóp þá rakleiðis upp með hlíðum fjallsins sem Leirvíkurgöngin eru hoggin í og neitaði að koma þaðan niður.

Lögregla kom skömmu seinna á vettvang og eftir að hafa reynt í á annan klukkutíma að sannfæra manninn um að klifra niður úr fjallshlíðinni var þyrla kölluð út. Á endanum um þrjúleytið lét maðurinn til leiðast og honum var ásamt nokkrum lögreglumönnum flogið niður á jafnsléttu.

Líkt og Eysturoyarportalurin tekur fram í umfjöllun sinni af málinu liggur engin skýring fyrir á því hvers vegna maðurinn tók til fótanna og dvaldi uppi í fjalli allan þennan tíma en til allrar lukku er hann óhultur og lögreglumennirnir sömuleiðis.

„Ég get ekkert sagt um hvers vegna það var en viðkomandi ökumaður spretti af stað og upp í hamar,“ hefur Kringvarpið eftir Jóannesi Østerø varðstjóra hjá lögreglunni þar í landi.