Lineker fok­illur við blaða­mann: „Því­líkt kjaft­æði“

Lineker var starfsmaður breska ríkisútvarpsins og stýrði Match of the Day, yfirferðarþætti enska boltans, í 26 ár – frá 1999 þar til síðasta vor. Lineker átti að klára feril sinn hjá BBC eftir HM 2026 en eftir færslu hans á samfélagsmiðlinum X gegn síonisma var hann sakaður um gyðingaandúð.

Hann hafði áður verið sendur í leyfi árið 2023 vegna færslna á samfélagsmiðlum og komst hann að samkomulagi við stjórnendur hjá BBC um starfslok í vor.

Greint var frá því á dögunum að Lineker hafi samið við Netflix um að hlaðvarp hans, The Rest Is Football, verði daglega í boði á streymisveitunni á meðan mótinu stendur. Lineker var á sínum tíma hæst launaði sjónvarpsmaður BBC, en laun hans fyrir starf sitt hjá Netflix eru sögð umtalsvert hærri en hjá breska ríkisútvarpinu.

Mike Keegan, ritstjóri á íþróttavef Daily Mail, birti grein í fyrradag þar sem hann segir meðal annars að: „Netflix-gullkistan er ekki aðeins fyrstu skref Linekers í átt að endurlausn, heldur einnig hefnd.“ Hinn 65 ára gamli Lineker „hafi sjónar á því að láta fyrrverandi vinnuveitendur sína sjá eftir uppsögninni“.

Lineker sé því í hefndarhug gegn fyrrum vinnuveitendum sínum og vilji með öllum leiðum gera betur, bæði fyrir sjálfan sig og láta BBC líta illa út í leiðinni.

Lineker deildi greininni á X-síðu sinni í gær og sagði einfaldlega: „Ekki satt. Þvílíkt kjaftæði.“