Pokrovsk riðar til falls

Rússar hófu áhlaupið að Pokrovsk í rauninni í fyrra. Sóknin hefur gengið mjög hægt fyrir sig, heilt yfir, en hún hefur tekið kippi. Talið er að Rússar hafi orðið fyrir miklu mannfalli á þessum tíma.

Úkraínumenn hafa notast sérstaklega mikið við dróna og stórskotalið við varnir sínar í Pokrovsk og nærliggjandi svæðum. Drónanotkun hefur aukist sérstaklega svo Úkraínumenn geti notað færri menn til að halda víglínunni.

Þegar leið á vorið færðist þó aukinn kraftur í sókn Rússa. Það var að miklu leyti rakið til aukins gróðurs sem gerir rússneskum hermönnum auðveldar að forðast dróna Úkraínumanna, hvort sem þeir eru búnir sprengjum eða myndavélum til eftirlits.

Sjá einnig: Aukinn hraði í framsókn Rússa

Fyrr í sumar sögðu ráðamenn í Kænugarði að Rússar væru búnir að safna allt að 110 þúsund mönnum á svæðinu við Pokrovsk. Nú er staðan sú að Rússar eru nærri því að umkringja borgina úr þremur áttum. Borgin var lengi mikilvæg birgðamiðstöð fyrir Úkraínumenn og situr hún á umfangsmiklu magni af kolum í jörðu.

Nánar má skoða stöðuna á korti hóps sem kallast DeepState.

Þegar mest var bjuggu um sextíu þúsund manns í borginni en nú er talið að þar séu eingöngu nokkur hundruð manns, samkvæmt frétt Reuters, en borgin hefur að miklu leyti verið lögð í rúst í sprengjuregni Rússa.

Blaðamenn Reuters hafa verið á ferðinni í og kringum Pokrovsk á undanförnum mánuðum til að fylgjast með vörnum Úkraínumanna og breyttum aðferðum Rússa. Sókn Rússa þar hefur um nokkuð skeið verið sú umfangsmesta á allri víglínunni í Úkraínu.

Eins og áður segir hófu Rússar áhlaupið að Pokrovsk snemma á síðasta ári og gerðu umfangsmiklar árásir í átt að borginni. Þá voru þeir stöðvaðir og reyndu þess í stað að fara framhjá borginni og umkringja hana.

Síðan þá hafa Rússar sótt hægt fram en Úkraínumenn sendu reyndari hermenn til borgarinnar í vor, lögðu mikið af jarðsprengjum á svæðinu og reistu ýmis varnarvirki.

Einn hermaður sem ræddi við Reuters sagði að Rússarnir hefðu sífellt reynt að sækja fram, þó þeir yrðu fyrir mannfalli. Aðferðir þeirra hafa breyst og hafa Rússar til að mynda notast sífellt meira við dróna og notað aðrar lexíur sem lærðust í orrustunni um Kúrskhérað.

Rússar nota mikið af snúrutengdum drónum. Það eru drónar sem eru tengdir með þunnum en löngum netsnúrum en það þýðir að ómögulegt er að nota sérstakan búnað til að trufla þá rafrænt og láta stjórnendur missa sambandið við þá.

Þessir drónar Rússa eru nú farnir að drífa allt að 25 kílómetra og hafa gert birgðaflutninga Úkraínumanna kringum Pokrovsk erfiða. Þar sem Rússar eru komnir langt með að umkringja borginna gætu Úkraínumenn átt engra kosta völ en að yfirgefa hana á næstu vikum eða mánuðum.

Sagði stöðuna mun skárri í Sumy

Þó Rússum hafi vegnað betur í Úkraínu hafa þeir einungis lagt undir sig um fimm þúsund ferkílómetra frá upphafi ársins 2024, sem samsvarar minna en einu prósenti af heildarlandsvæði Úkraínu. Rússar stjórna um fimmtungi af Úkraínu.

Þá hafa Rússar ekki hernumið stærri bæi eða borgir í framsókn þeirra, enn sem komið er.

Vólódímír Selenskí, forseti Úkraínu, sagði í síðustu viku að í raun væri búið að stöðva Rússa við Pokrovsk. Þeim gengi ekki vel að sækja fram en staðan væri gífurlega erfið fyrir úkraínska hermenn.

„Hún er einnig mjög erfið fyrir Rússana og það er jákvætt fyrir okkur,“ sagði Seleneskí samkvæmt AP fréttaveitunni.

Forsetinn sagði einnig að þeim rússnesku hermönnum sem hefðu komist inn í Pokrovsk hefðu verið reknir á brott. Hann sagði þetta hafa gerst fimm til sjö sinnum og um vær að ræða tvo til sex hermenn í flestum tilfellum. Einu sinni hafi tólf hermenn reynt að halda velli í Pokrovsk en þeir hafi allir verið felldir.

Þá sagði Selenskí að ástandið í norðurhluta Sumyhéraðs, sem liggur við landamæri Rússlands í norðurhluta Úkraínu, væri „mun skárra“ heldur en það hefði verið undanfarna mánuði. Þar hefðu úkraínskir hermenn verið að sækja fram á síðustu vikum.