Twitter-morðinginn tekinn af lífi

Takahiro Shiraishi var þekktur sem Twitter-morðinginn en hann mun hafa lokkað til sín þrjár táningsstúlkur, fimm ungar konur og einn mann í gegnum samskiptaforritið Twitter með því að bjóðast til að aðstoða þau við að fremja sjálfsmorð. Shiraishi var dæmdur til dauða árið 2020 en morðin framdi hann árið 2017.

Hann var handtekinn síðar það ár og þá fundust líkamsleifar fólksins í frystikistum heima hjá honum. Shiraishi var einnig ákærður fyrir að brjóta gegn stúlkunum kynferðislega. Aftakan hefur vakið á ný upp umræðuna um dauðarefsingar í Japan en þar eru nú 105 einstaklingar á dauðadeild og um helmingur þeirra reynir nú að snúa dómunum við.

Aftökur í Japan eru framkvæmdar í kyrrþey og fanginn fær ekki að vita af því sem til stendur fyrr en nokkrum klukkustundum áður en aftakan fer fram. Japan og Bandaríkin eru einu löndin í hópi helstu iðnríkja heims sem enn stunda aftökur.