Metinn sakhæfur og málið fyrir luktum dyrum

Karl Ingi Vilbergsson, saksóknari hjá héraðssaksóknara, greinir frá því í samtali við fréttastofu að Sigurður hafi verið metinn sakhæfur af yfirmati sem gert var við meðferð málsins. Þess má þó geta að það er dómsins að komast að því hvort hann teljist sakhæfur eða eða ekki í augum laganna.

Í svari Héraðsdóms Reykjaness, þar sem þinghaldið fer fram, við fyrirspurn fréttastofu segir að þinghaldið verði lokað til hlífðar fjölskyldu hinnar látnu, Kolfinnu Eldeyju Sigurðardóttur sem var einungis tíu ára gömul þegar hún lést.

Ekki var krafist úrskurðar um þessa ákvörðun dómara og því er hún endanleg. Að óbreyttu fer aðalmeðferð málsins fram þann 11. júní næstkomandi, en fjölskipaður dómur mun ákvarða um sekt eða sýknu Sigurðar.

Fréttastofa hefur ákæru málsins undir höndum þar sem ákveðin atriði hafa verið afmáð. Þar segir að Sigurðru sé ákærður fyrir manndráp og stórfellt brot í nánu sambandi. Atvikið sem málið varðar er sagt hafa átt sér stað á Hraunhólum við Krýsuvíkurveg við Vatnskarðsnámur þann 15. september.

Þá er þess krafist að Sigurður greiði fimm milljóna króna miskabótakröfu, og útfararkostnað sem hljóp á 1,5 milljónum.

Jafnframt er Sigurður Fannar ákærður fyrir fíkniefnalagabrot. Annars vegar fyrir vörslu ýmissa fíkniefna og lyfja sem voru í gámi við Kapelluhraun í Hafnarfirði, en efnin fundust sama dag og hann á að hafa orðið dóttur sinni að bana. Hins vegar er hann ákærður fyrir að hafa verið með í vörslum sínum 79 kannabisplöntur í bílskúr á ótilgreindum stað í Reykjavík. Plönturnar fundust nokkru áður, þann 14. maí á síðasta ári.

Hringdi sjálfur á neyðarlínuna

Sigurður hringdi á Neyðarlínuna um kvöldmatarleytið 15. september. Hann mun hafa verið óljós í máli sínu, óskýr um hvar hann væri staddur og hvað hafði gerst, en þó tilkynnt um andlát tíu ára gamallar dóttur sinnar.

Lögreglan kom á vettvang skömmu síðar. Þar var hann handtekinn og þá leituðu viðbragðsaðilar að stúlkunni sem fannst skammt frá. Strax hófust endurlífgunartilraunir sem báru ekki árangur. Sigurður Fannar er sagður hafa bent lögreglu á hvar hún væri.

Hann hefur sætt gæsluvarðhaldi síðan hann var handtekinn.

Áður hlotið dóma

Fyrir hálfum öðrum áratug hlaut Sigurður Fannar tæplega fjögurra ára fangelsisdóm fyrir innflutning á umtalsverðu magni á fíkniefna. Fyrir dómi sagðist hann hafa neyðst til að fara í ferðina sem burðardýr vegna alvarlegra hótana í garð fjölskyldumeðlims.

Hann hlaut síðan skilorðsbundinn fangelsisdóm um áratug síðar vegna kannabisplanta og maríjúana sem fund á heimili sínu í Reykjavík. Hann játaði brot sitt skýlaust í því máli.