Lokum.is

Samtök áhugafólks um spilafíkn voru stofnuð árið 2019 af hópi fólks sem lætur sig málefni spilafíkla, spilakassa og fjárhættuspila varða. Eitt af fyrstu verkum samtakanna var að ráðast í skoðanakönnun sem kannaði viðhorf Íslendinga til spilakassa og hvort Íslendingar vildu almennt loka spilakössum til framtíðar. Niðurstöðurnar voru mjög afgerandi og 86% þjóðarinnar vildi að þeim yrði lokað. Auk þess er viðhorf almennings almennt mjög neikvætt gagnvart því að stofnanir sem gefa sig út fyrir að starfa í almannaþágu séu að fjármagna sig með spilakössum. Síðan þá hafa aðrir látið sig málaflokkinn varða og tekið afstöðu.

Stúdentaráð vill burt með spilakassa

Stúdentaráð Háskóla Íslands sendi frá ályktun árið 2021 þar sem segir meðal annars; „Stúdentaráð hvetur Háskólann til að taka skýra afstöðu, segja skilið við umræddan rekstur og setja gott fordæmi fyrir aðrar stofnanir sem hafa aðkomu að samskonar starfsemi“. Nemendur skólans eru afgerandi og taka skýra afstöðu.

Sama ár skilaði starfshópur á vegum skólans skýrslu sem tók af allan vafa og kom þar meðal annars fram að ef til „skaðaminnkandi aðgerða“ yrði grípið yrði tekjuhrun í rekstri spilakassa en þar með staðfestir starfshópurinn að meirihluti þess gríðarlega hagnaðar sem næst með rekstri spilakassa kemur úr vasa fólks sem hefur þróað með sér spilafíkn.

Starfshópur HÍ bendir á neikvæðar afleiðingar spilakassa

Auk þess segir „þá er það engum vafa undirorpið að þessi helsta menntastofnun þjóðarinnar getur ekki staðið að rekstrinum öðruvísi en að taka tillit til nýjustu rannsókna um áhrif spilakassa á tiltekna hópa samfélagsins og með því að taka upp allar mögulegar aðgerðir sem geta stuðlað að ábyrgri spilun og lágmarkað neikvæðar afleiðingar jafnt fyrir einstaklinga og samfélagið í heild“.

Brugðust í Covid!

Í Covid-19 þegar fyrirtækjum, skólum og stofnunum var lokað til að vernda líf og heilsu almennings horfðum við í samtökunum upp á þá staðreynd að Háskóli Íslands, Rauði krossinn og Landsbjörg reyna með öllum mögulegum brögðum að hafa spilakassa sína opna, en fyrir tilstuðlan Samtaka áhugafólks um spilafíkn var spilakössum á endanum lokað – en aðeins tímabundið.

Afvegaleiða með ósannindum

Í hita þessarar baráttu var farið í árvekniverkefnið LOKUM.IS. Þar var lögð áhersla á persónulega reynslu fólks af spilakössum og leitast við að leiða samfélagið inn í heim spilakassa og afleiðingar þessarar starfsemi. Það hafði nefnilega verið svo í ár og áratugi að eigendur spilakassa höfðu ítrekað komið opinberlega fram og dregið upp saklausa mynd af þessari starfsemi og sumir jafnvel vísvitandi með ósannindum afvegaleitt fólk til þess að breiða yfir hversu ósiðleg og ógeðfeld starfsemi spilakassa er og hve margir eiga um sárt að binda vegna hennar.

Í myrkrinu þar til við lokum

Þessi starfsemi er flestum hulin og í myrkrinu. En fæstir þeirra sem telja peningana sem koma upp úr kössunum myndu nokkurn tíma sjálf/sjálfir fara og því síður væru þeir sömu til að í að fórna sínum nánustu í spilakassa.

En hér erum við enn og ekkert hefur verið gert. En við erum ekki hætt og krafa okkar mun heyrast af vaxandi þunga: Lokum.is

Höfundur er formaður Samtaka áhugafólks um spilafíkn.