Notuðu ó­virka gaslögn til að koma aftan að Úkraínumönnum

AP og CNN fjalla um árásina sem er þáttur í gagnsókn Rússa til að endurheimta héraðið.

Úkraínumenn réðust inn í Kúrsk í ágúst 2024 í stærstu árás á rússneskt landsvæði frá Seinni heimsstyrjöld. Á nokkrum dögum tókst úkraínskum hermönnum að taka yfir þúsund ferkílómetra landsvæðis og tóku mörg hundruð rússneskra stríðsfanga.

Yfirlýst markmið Úkraínumanna með yfirtöku héraðsins var til að geta búið til hlutlaust svæði milli landanna, til að geta nýtt svæðið sem samningatæki og til að stöðva sókn Rússa í austurhluta Úkraínu. Rússar hófu strax gagnsókn til að endurheimta héraðið.

Eftir margra mánað átök eiga tugir þúsunda úkraínskra hermanna á hættu á að vera innikróaðir af meira en 50 þúsund hermönnum Rússa og Norður-Kóreu.

Að sögn úkraínska bloggarans Yuri Podolyaka, sem er stuðningsmaður Rússa, gengu rússneskir sérsveitar-hermenn um fimmtán kílómetra leið eftir gaslögn, sem hafði þar nýlega verið notuð til að senda gas til Evrópu, til að koma aftan úkraínska hernum í bænum Súdsja. Einhverjir hermannanna hafi verið dögum saman í pípunum áður en þeir réðust til atlögu.

Annar stríðsbloggari, sem styður Rússa og gengur undir nafninu Two Majors, sagði hörð átök vera hafin um Súdsja. Rússnesir hermenn hefðu komist inn í bæinn frá gaslögninni.

Uppgötvuðu hermennina „í tæka tíð“

Úkraínski stríðsbloggarinn Yuriy Butusov sagði Rússa hafa komist inn í Súdsja án þess að drónar hefðu orðið þeirra varir og þannig náð að koma sér inn í stríðsfylkingu úkraínska hersins. Hins vegar sagði hann gaslögnina nú vera undir eftirliti Úkraínumanna og að verið væri að „útrýma“ rússneskum hermönnum.

Butusov tók þó fram að rússneskir og norðurkóreskir hermenn hefðu töluverða yfirburði hvað varðaði fjölda og ræðust linnulaust á úkraínska herinn.

Á rússneskum síðum Telegram er að finna myndir sem eru sagðar vera af sérsveitarmönnunum með gasgrímur.

Herforingaráð Úkraínu staðfesti svo á laugardagseftirmiðdag að rússneskir „skemmdar- og árásarhópar“ hefðu notað gaslögnina til að ná fótfestu utan við Súdsja. 

Í telegram-færslu herforingjaráðsins sagði að Úkraínumenn hefðu uppgötvað árás rússnesku hermannanna „í tæka tíð“ og ráðist á þá með eldflaugum og stórskotaliði.

Rússneska varnarmálaráðuneytið greindi frá því í dag að hermenn hefðu náð yfirtökum yfir þorpinu Lebedevka sem er um tólf kílómetrum norðvestur af Súdsja. Ekki kom þó fram hvenær þeir hefðu tekið þorpið.