Hafði verið veður­tepptur á Sprengi­sands­leið í þrjá daga

Sagt er frá þessu í tilkynningu frá Landhelgisgæslunni. Þar segir að vel hafi gengið að finna ferðamanninn sem hafi gefið viðbragðsaðilum upp staðsetningu sína með GPS-hnitum. 

„Áhöfnin á TF-GNA aðstoðaði manninn við að taka saman búnað sem hann hafið meðferðis og viðkomandi var fluttur með þyrlunni til Reykjavíkur. Ferðamaðurinn hafði verið í rúmar tvær vikur á ferðalagi en setið fastur á Sprengisandsleið í þrjá daga eins og áður segir. Þegar þyrlusveitin lenti í Reykjavík hóf hún strax undirbúning vegna annars útkalls, nú vegna veikinda í Vestmannaeyjum.

Vikan hjá þyrlusveitinni hefur því verið nokkuð annasöm,“ segir í tilkynningunni.

Ennfremur segir að þyrlusveit Landhelgisgæslunnar hafi í níu skipti verið kölluð út í vikunni vegna mála af ýmsum toga. Flest útköllin hafi verið vegna bráðra veikinda en einnig vegna slysa.