Inn­viða­upp­bygging og við­hald í Sveitar­fé­laginu Ár­borg

Í ört stækkandi sveitarfélagi er að mörgu að huga, sinna þarf viðhaldi og endurbótum ásamt því horfa til framtíðar, byggja upp innviði í takt við þróun samfélagsins. Forgangsraða þarf framkvæmdum, tryggja fjármögnun og mæta þörfum fjölbreyttra hópa. Þrátt fyrir fjárhagsvanda Árborgar undanfarin ár hefur okkur tekist að mæta þessum þörfum að mestu. Í nýsamþykktri fjárfestingaráætlun fyrir árin 2025-2028 er lögð höfuðáherslu á viðhald og endurbætur auk nýframkvæmda. Áætlað er að fjárfest verði fyrir 2,45 milljarða króna árið 2025.

Viðhald og endurbætur

Af helstu viðhaldsaðgerðum og endurbótum má nefna endurnýjun gatna. Þar eru elstu götur sveitarfélagsins endurhannaðar, skipt út lögnum, ljósastaurum og malbikað. Unnið hefur verið við hluta Rauðholts á Selfossi og er áætlað að halda áfram að Engjavegi á næsta ári. Þá er áætluð endurnýjun á malbiki og göngustíg á Eyrargötu á Eyrarbakka frá Húsinu og fram yfir Stað. Í Vallaskóla er haldið áfram endurbótum innanhús með það markmiði að bæta starfsumhverfi starfsfólks og nemenda. Skólalóðin umhverfis Vallaskóla verður hönnuð og hafin uppbygging sem lengi hefur verið kallað eftir.

Selfossveitur

Rannsóknarleitir eftir heitu vatni hafa skilað árangri á árinu 2024 og unnið verður á næsta ári að virkjun þeirra borholna sem teljast vinnsluhæfar. Má þar nefna SE-45 við Hótel Selfoss. Byggt verður upp dæluhús og holan tekin í notkun undir lok árs 2025, mun hún skila um 15-20 lítrum á sekúndu af yfir 70 gráðu heitu vatni. Þá er önnur borhola við Sóltún SE-46 en hún verður dýpkuð með von um aukin afköst og síðan virkjuð. Áætlað er að fara með þessa borholu á 1.500 metra dýpi. Engin af borholunum hér innanbæjar eru undir þúsund metra svo þessi framkvæmd ætti að gefa góðar vísbendingar um okkar nýja orkuöflunar svæði innanbæjar á Selfossi. Í dreifingu og miðlun mun klárast uppbygging á nýjum miðlunargeymi sem mun taka 4.800 rúmmetrar og gjörbreyta rekstraröryggi Selfossveitna, en hann er tvöfalt stærri en sá sem fyrir er. Endurnýjun stofnlagna mun halda áfram til að tryggja uppbyggingu í sveitarfélaginu öllu. Má þar nefna lagnir í dreifikerfi innan Selfossbæjar og svo endurnýjun á Eyrarlögninni sem tryggir heitt vatn fyrir dreifbýlið, Eyrabakka og Stokkseyri, en þar er mikil uppbygging framundan á næstu árum.

Skólamál

Hafist verður handa við stækkun Jötunheima úr sex deilda leikskóla í tólf deilda, gert er ráð fullnaðarhönnun og byrjun á jarðvinnu á næsta ári. Skólinn verði opnaður sem tólf deilda leikskóli og fullkláraður með stærri skólalóð árið 2028. Annar áfangi Stekkjaskóla klárast nú um áramót en við það er skólinn fullbyggður fyrir tíu bekkjardeildir án íþróttahúss. Í dag eru nemendur í sjö bekkjardeildum og kennt verður í fyrsta sinn frá 1-10. bekk haustið 2027. Hönnun þriðja áfanga verður unnin á næsta ári en þar verður gert ráð fyrir íþróttahúsi og nýjum tónlistarskóla. Hönnun og jarðvinna fyrir nýja kennslusundlaug við Sundhöll Selfoss hefst á næsta ári. Ásamt þessu öllu þarf að horfa enn lengra fram í tímann við uppbyggingu skólahúsnæðis og mun undirbúningur við gerð fjórða grunnskólans á Selfossi hefjast næsta haust.

Vatns- og fráveitan

Líkt og aðrir innviðir þarf vatnsveitan að geta vaxið í takt við samfélagið. Því verður byrjað á nýju dæluhúsi fyrir vatnsveituna á næsta ári sem verður klárt árið 2027 og í kjölfarið nýr miðlunargeymir byggður. Allt okkar kalda vatn kemur frá vatnsöflunarsvæðinu í Ingólfsfjalli. Við gerð nýrrar Ölfusárbrúar mun vatnsveitan leggjast í fjárfestingar til að koma nýjum vatnslögnum fyrir til að tryggja áframhaldandi uppvöxt vatnsveitunnar.

Í fráveitunni er Hreinsistöðin í Geitanesi enn í fullri framkvæmd og mun hún hreinsa allt skólp frá Selfossi. Áætlað er að taka stöðina í notkun vorið 2026 með fyrsta þreps hreinsun. Síðan munu næstu flokkar hreinsunar bætast við eftir að reynsla hefur verið komið á rekstur stöðvarinnar.

Aðrar framkvæmdir

Við gerð nýrrar Ölfusárbrúar greiðir sveitarfélagið um milljarð við lagningu á nýjum tengivegum og stofnlögnum fyrir vatns- og hitaveitu. Þannig mun allt heitt vatn koma inn í miðlunarkerfi Selfossveita á sama stað, en í dag eru hitaveituholurnar fyrir utan dælt beint inná inn á dreifikerfið án miðlunar. Áfram verður haldið með lagningu göngu- og hjólreiðastíga frá Selfossi að fjörustígnum milli Eyrarbakka og Stokkseyris. Stígurinn er á lokametrunum og tryggja þarf örugga þverun yfir Eyrarbakkaveg. Endurnýjun á ljósastaurum og götulýsingu heldur áfram með því að LED-væða alla lýsingu í sveitarfélaginu. Ásamt því verður farið í aðgerðir til hraðalækkunar við fjölfarnar gönguþveranir, einkum gönguleiðir skólabarna, með það að markmiði að bæta umferðaröryggi.

Fyrir hönd meirihluta bæjarstjórnar Árborgar

Álfheiður Eymarsdóttir bæjarfulltrúi Á-lista og Sveinn Ægir Birgisson bæjarfulltrúi D-lista