For­sætis­ráð­herra segir sátt ríkja um samgöngusáttmála

Fulltrúar ríkisins og sveitarfélaganna sex á höfuðborgarsvæðinu skrifuðu undir uppfærða samgönguáætlun í Salnum í Kópavogi í dag, Borgarlína hefur fengið mesta almenna umræðu en sáttmálinn nær einnig til mjög margra stórra samgönguverkefna. Sæbraut verður lögð í stokk, jarðgöng verða grafin undir Miklubraut frá Skeifunni að Landspítalanum og einnig undir hluta Kringlumýrarbrautar. Arnarnesvegur og fjölmörg mislæg gatnamót heyra til verkefnisins sem og hundað kílómetrar af hjóla- og göngustígum.

Ríkið mun fjármagna 87,5 prósent framkvæmdanna og sveitarfélögin 12,5 prósent, sem þýðir að áætlaður kostnaður ríkisins á framkvæmdatímanum er 272 milljarðar.

Þrátt fyrir gagnrýnisraddir telur Bjarni Benediktsson forsætisráðherra almenna sátt ríkja um þá sýn sem felist í verkefninu.

„Um mikilvægi þess að við sköpum hér samkeppnishæft höfuðborgarsvæði. Að við munum ekki leysa úr samgönguáskorununum nema með öflugum almenningssamgöngum og sterku göngu- og hjólreiðastígakerfi ásamt með mikilvægum stofnvegaframkvæmdum. Það er til dæmis enginn ágreiningur um neinar af þessum helstu stofnvegaframkvæmdum,“ segir Bjarni.

Eðlilega komi síðan upp ólík sjónarmið þegar komi að skipulagsmálum sem leyst verði úr í tímans rás. Samningurinn var undirritaður með fyrirvara um samþykkt Alþingis og sveitarfélaganna sex, sem eru Reykjavík, Kópavogur, Hafnarförður, Garðabær, Mosfellsbær og Seltjarnarnes.

Við uppfærsluna var framkvæmdatíminn lengdur um sjö ár og nú er áætlað er að þessu risaverkefni verði lokið árið 2040. Af 311 milljörðum fara 42 prósent í stofnvegi, önnur 42 prósent í Borgarlínu, 13 prósent í hjóla- og göngustíga og 3 prósent í umferðarstýringu, flæði og öryggi.

Þegar er búið að ljúka hluta stofnvegaframkvæmda og hjólastíga. Borgarlínan verður síðan tekin í notkun í sex lotum og stöðugt verður unnið að hjóla- og göngustígum og umferðarstýring kemur brátt til framkvæmda.

„Mikilvægast er að við höfum þessa sýn. Hún snýst um það að bæta lífsgæði fólks á höfuðborgarsvæðinu. Fara í mikilvæga og nauðsynlega innviðafjárfestingu og allir útreikningar sýna að það mun verða a því mjög mikill ábati fyrir samfélagið í heild sinni,“ segir forsætisráðherra.

Það er nýtt að ríkið komi að framtíðarrekstri almenningssamgangna á höfuðborgarsvæðinu.

„Við einfaldlega komumst að þeirri niðurstöðu eftir að hafa lagst yfir þetta að þetta er slík gjörbreyting á almenningssamgangnakerfinu með þessari stórauknu tíðni og miklu þéttriðnara neti, að sveitarfélögin myndu þurfa meiri stuðning en þau hafa haft til þess rekstrar. Ríkið axlar þá ábyrgð á þriðjungi þess kostnaðar,“ segir Bjarni Benediktsson.

Viðtalið við Bjarna í heild sinni má sjá í spilaranum hér fyrir neðan.