Verk­fall VR í að­draganda páska hefði mikil á­hrif

Verslunarmenn sögðu sig frá breiðfylkingunni í viðræðum við Samtök atvinnulífsins og áttu því ekki aðild að kjarasamningum Starfsgreinasambandsins, Eflingar og Samiðnar sem undirritaðir voru síðast liðinn fimmtudag.

Ragnar Þór Ingólfsson formaður VR segir að ræða þurfi fjölmörg mál í viðræðum við Samtök atvinnulífsins.

„Kjarasamningar eru í eðli sínu ólíkir á milli stéttarfélaga og starfsgreina. Þannig að þetta gæti alveg tekið smá tíma,“ segir formaðurinn.

En VR sækir líka á um breytingar á sérkjarasamningi starfsmanna hjá Icelandair á Keflavíkurflugvelli þar sem tekist er á um vaktafyrirkomulag. Tvennum sögum fer af því hvort Icelandair og SA hafi viljað ræða þau mál.

Í morgun hófst atkvæðagreiðsla sem líkur á fimmtudag hjá þessum starfsmönnum um röð verkfallsaðgerða.

Frá miðnætti á föstudag í næstu viku til miðnættis sunnudaginn 24. mars. Í einn sólarhring frá miðnætti miðvikudaginn 27 mars, í þrjá sólarhrings frá 31. mars til 2. apríl,  í fjóra sólarhringa frá miðnætti föstudagsins 5. apríl fram til miðnættis 9. apríl og síðan ótímabundin vinnustöðvun frá miðnætti föstudagsins 12. apríl hafi ekki samist fyrir þann tíma.

Verkfallsaðgerðirnar næðu til um 180 starfsmanna í innritun farþega og hlaðmanna hjá Icelandair og myndu hafa mikil áhrif á áætlun Icelandair.

„Ég held að þetta gæti haft veruleg áhrif á flugsamgöngur hjá Icelandair. Þetta er framlínufólkið hjá Icelandair. Þetta er fólkið sem tekur á móti okkur uppi á flugvelli og afgreiðir okkur inn niðri í sal. Tékkar okkur inn í flugvélarnar. Sér um farangurinn og alla þá umsýslu. Þannig að þetta eru gríðarlega mikilvæg framlínustörf sem um er að ræða,“ segir formaður VR.

Sigríður Margrét Oddsdóttir framkvæmdastjóri Samtaka atvinnulífsins er bjartsýn á viðræðurnar við verslunarmenn. Stefnan hafi að stórum hluta verið mörkuð með samningunum við félög innan breiðfylkingarinnar á fimmtudag. VR hafi tekið þátt í mótun þeirra samninga áður en verslunarmenn sögðu sig frá breiðfylkingunni.

„Við erum hér komin með skynsama launastefnu. Langtíma kjarasamninga við flest stéttarfélög og landsambönd. Við trúum því að við eigum að geta samið við VR líka,“ segir Sigríður Margrét.

Hún telji hins vegar eðlilegast að VR færi með vaktamál starfsmanna á Keflavíkurflugvelli fyrir Félagsdóm. Verkfall um háannatíma í kring um páska hefði skaðleg áhrif á ferðaþjónustuna.

„Það liggur alveg fyrir. Þess vegna skiptir mjög miklu máli að við notum tímann vel næstu daga til að ekki þurfi að koma til þess,“ segir Sigríður Margrét Oddsdóttir.