Bjarki með skila­boð til Sér­sveitarinnar: „Erum gríðar­lega þakk­látir“

Ljóst er að Ísland verður að vinna Austurríki í dag, helst með fimm marka mun, og takist það segir Bjarki menn geta gengið sátta frá mótinu, þó að rýna þurfi í hvernig liðið mætti til leiks á mótinu.

„Bítur ekkert á Árbæinginn“

Ísland gæti þurft að spjara sig án nokkurra sterkra leikmanna í dag. Ljóst er að Gísli Þorgeir Kristjánsson verður ekki með vegna meiðsla, og Ýmir Örn Gíslason tekur út leikbann. Í gærmorgun voru fjórir leikmenn liðsins auk þess veikir, þeir Ómar Ingi, Janus Daði, Kristján Örn og Óðinn Þór.

„Það koma alltaf upp einhver veikindi en vonandi verða þau ekki fleiri. Við megum ekki við fleiri forföllum. En það bítur ekkert á Árbæinginn,“ sagði Bjarki, sem ólst upp í Árbæ, léttur í gærmorgun.

Austurríkismenn hafa komið liða mest á óvart á EM en Íslandi gekk vel gegn þeim í vináttulandsleikjum fyrir mótið.

„Við unnum þá nokkuð sannfærandi í þessum tveimur leikjum en samt var maður með þá tilfinningu að við ættum helling inni. En þeir eru hættir að koma á óvart. Þeir eru bara drulluöflugir, með gott skipulag og gera lítið af mistökum. Það er valinn maður í hverju rúmi en þeir spila dálítið mikið á sama liðinu þannig að vonandi getum við nýtt okkur það með því að keyra á þá,“ segir Bjarki.

Tókst með hjálp Sérsveitarinnar

Sigurinn góði á Króötum í fyrradag ætti að gefa mönnum gott sjálfstraust og Bjarki var sérstaklega ánægður með stuðninginn úr stúkunni. Þar fór fremst í flokki Sérsveitin, stuðningsmannasveitin sem fylgt hefur strákunum okkar allan tímann í Þýskalandi.

„Þetta var mjög sterkt því við hefðum auðveldlega getað brotnað við allt þetta mótlæti; Ómar og Janus dottnir út, Gísli meiðist og Ýmir fær rautt. Það hefði verið auðvelt að leggjast niður og gefast upp. En við náðum að þétta okkur saman, með hjálp Sérsveitarinnar í stúkunni. Ég vil koma þökkum til þeirra. Við erum gríðarlega þakklátir fyrir þann stuðning sem við fáum hérna. Þannig náðum við að koma til baka og vinna mjög sterkt lið Króata, og gefa okkur smá búst fyrir þennan lokaleik.

Þau [í Sérsveitinni] eru alltaf öflug. Það er ekkert sjálfsagt að þau taki sér frí frá vinnu og fylgi okkur hérna í tvær vikur út allt mótið. Við erum gríðarlega þakklátir fyrir það og vonandi getum við gefið þeim annan alvöru leik [í dag].“

Næsti leikur Íslands á EM er gegn Austurríki í dag klukkan 14:30 að íslenskum tíma. Öflugt teymi Vísis og Stöðvar 2 er í Köln og flytur fréttir af mótinu í máli og myndum.