Hákon Daði Styrmisson: „Standardinn þarf að vera hærri“

Hákon Daði var þó ekki sigurreifur eftir leikinn og talaði af mikilli alvöru um frammistöðu og hugarfar sem væri verið að rækta í hans liði.

„Burt séð frá burstinu, þá erum við bara að einbeita okkur að okkur sjálfum. Við erum að vinna í hlutum hjá okkur og það sást kannski í dag að sama hver staðan er þá þarf bara að halda áfram. Sama hvort við erum að tapa með tíu, jafn leikur, vinna með tíu, það á bara alltaf að vera eins. Þeir sem eru inn á eru bara á fullu,“ sagði Hákon Daði og hélt áfram.

„Við erum með prinsipp, við erum með reglur, það á ekki að gleyma sér og við þurfum að halda í fókusinn ef við ætlum að halda áfram að byggja á þessu eins og við erum að gera. Þá þarf þetta að vera í lagi sama hver staðan er.“

Hákon Daði skoraði 17 mörk í leiknum sem komu í öllum regnbogans litum. Var hann kominn með 15 mörk þegar u.þ.b. korter var eftir af leiknum og var Hákon Daði þá settur í stöðu leikstjórnanda, en Hákon Daði er hornamaður. Var vart hægt að sjá annað en að það ætti að koma Hákoni Daða í fleiri skotstöður með þessu til þess að skora fleiri mörk.

Hákon gaf þó lítið fyrir markagræðgina.

„Ef ég er inn á þá langar mér að hjálpa liðinu og ég geri það best með því að skora mörkin.“

Hákon Daði skipti yfir í Aftureldingu í sumar eftir að hafa verið hjá sínu uppeldisfélagi síðari hluta síðasta tímabils eftir að hafa komið heim úr atvinnumennsku. Aðspurður út í það hvernig það væri að vera kominn í Aftureldingu og hvernig fyrstu mánuðirnir hafa verið, þá hafði Hákon Daði þetta að segja.

„Það er bara fínt. Fullt sem hægt er að laga, fullt sem hægt er að bæta og betrumbæta. Það er margt gott sem við erum að gera. Standardinn þarf að vera hærri, bæði hjá okkur og hjá félaginu, sem við erum að vinna í. Eins og ég segi, við þurfum að halda áfram að gera það sem við erum að gera,“ sagði Hákon Daði að lokum.