Frost í við­ræðum flug­um­ferðar­stjóra og SA

Sigurður Ingi Jóhannsson innanríkisráðherra segist vona að viðsemjendur í deilu flugumferðarstjóra og Samtaka atvinnulífsins séu meðvitaðir um ábyrgð þeirra við þær aðstæður sem nú ríki í samfélaginu.

Kemur til greina að kalla þing saman fyrir jól til að leggja fram frumvarp um málið?

„Það er vissulega margt til hérna í ráðuneytinu. Því miður er það svo að það eru bæði til frumvörp og lög frá gamalli tíð um aðgerðir flugumferðarstjóra,“ segir Sigurður Ingi. Ekkert frumvarp væri hins vegar í smíðum þessa stundina.

Talin var þörf á að skýra heimildir embættis Ríkissáttasemjara eftir átökin ítengslum við síðustu kjarasamninga Eflingar en ekkert varð aðlagabreytingum í þá átt.

Er það að koma í bakið á mönnum núna?

„Það var alla vega matið að mikilvægt væri að allir aðilar vinnumarkaðarins ísamfloti um þær aðgerðir sem þyrfti að gera. Það er mín skoðun að ríkissáttasemjari þurfi að hafa víðtækari heimildir. Ekkert ósvipað og við þekkjum frá Norðurlöndunum. Löndum sem við gjarnan berum okkur saman við,“ segir innviðaráðherra.

Viðræður flugumferðarstjóra væru ekki upphaf þeirra viðræðna sem nú stæðu yfir á almenna vinnumarkaðnum um mögulega samninga til nokkurra ára. Þetta væri lokahnykkurinn í samningalotu sem lauk fyrir og í kringum síðustu áramót

„Við erum auðvitað að hefja viðræður um vonandi lengri tíma samninga hér á almennum markaði sem myndi verða fyrirmynd annarra samninga álandinu. Sem myndu skipta miklu máli fyrir framgang lands og þjóðar,“ segir Sigurður Ingi.

Næsta vinnustöðvun flugumferðarstjóra er boðuð á miðvikudag og hafa þeir ekki boðað frekari aðgerðir að þeim loknum.

Yrði það dropinn sem fyllti mælinn?

„Eins og ég segi, við erum með augun á þessu. Við ætlumst til að þetta fólk semji en við erum með augun á því sem er að gerast.“

Er samstaða inna stjórnarflokkanna þriggja um það eða eru ólík sjónarmið uppi innan stjórnarflokkanna um hvað beri að gera?

„Það er samstaða,“ segir Sigurður Ingi Jóhannsson.

Sáttasemjari ekki haft orð á miðlunartillögu

Rætt var við Aldísi Magnúsdóttur, sáttasemjara í deilunni, í beinni útsendingu í kvöldfréttum Stöðvar 2 í kvöld. Hún segir miðlunartillögu enn ekki hafa verið nefnda.

Það var ekkert fundað í dag, er ekkert að gerast í deilunni?

„Við höfum verið í svona óformlegu samráði við samningsaðila í dag og erum búin að vera að miðla málum. Við erum svona að þreifa fyrir okkur um hvaða möguleikar eru í stöðunni miðað við hvernig staðan á samtalinu er.“

Er það langt í milli aðila að miðlunartillaga hefur verið rædd?

„Eins og ég segi, við erum bara að þreifa fyrir okkur, hvaða möguleikar eru í stöðunni, en við höfum ekki haft orð á því allavega enn sem komið er, ekki út á við.“

Rúmlega þrjátíu þúsund farþegar hafa orðið fyrir röskun á sínum flugferðum vegna aðgerða flugumferðarstjóra. Síðasta boðaða aðgerð er næsta miðvikudag.

Telurðu einhverjar líkur á að deiluaðilar komi saman á morgun?

„Það eru þreifingar í gangi og það er ekkert útilokað að þeir komi saman á morgun, en það er ekki vitað að svo stöddu.“

Aldís segist ekki vilja greina frá því hvaða atriði það eru sem ber á milli deiluaðila. Hvort það séu hreinar og beinar launahækkanir eða aðrir liðir. „Þetta er bara snúin staða eins og við höfum áður lýst.“

Er verið að tala um langtímasamning eða stuttan samning?

„Eins og ég segi, þetta er bara erfið staða en þetta hefur verið þessi svipaða lengd á samningi sem hefur verið til umræðu eins og verið hefur hjá öðrum,“ segir Aldís og á þar við skammtímasamninga sem gerðir voru á síðasta ári.