Mót­mæla að­gerða­leysi RÚV og vilja að Ís­land taki fyrsta skrefið

Tæplega 9.500 undirskriftir hafa safnast til stuðnings kröfu um að Ísland dragi sig úr Eurovision, sem fer fram í Svíþjóð í maí. Vonir eru uppi um að þrýsta með þessu á stjórn Sambands evrópskra sjónvarpsstöðva að vísa Ísrael úr keppninni vegna árása stjórnvalda þar í landi á íbúa Gasa.

Rússlandi ekki vísað út fyrr en eftir hótanir Finna

Mótmælin hefjast korter í fjögur síðdegis og munu forsvarsmenn mótmælanna afhenda Stefáni Eiríkssyni útvarpsstjóra undirskriftalistann klukkan fjögur.

„Við vonumst auðvitað til að sjá sem flest við þetta tilefni. Við vitum að það er almennt mikið ósætti með aðgerðaleysi RÚV í þessu máli. Við viljum sjá frekari aðgerðir frá RÚV. Það var nú þannig að Rússlandi var ekki vísað úr keppni fyrr en Finnar hótuðu að draga sig út. Það er hver sem er sem getur tekið þetta fyrsta skref og við viljum að það verði Ísland,“ segir Sema Erla Serdar, talskona samtakanna BDS á Íslandi, alþjóðlegrar hreyfingar sem leidd er af palestínsku þjóðinni.

Rússlandi var vísað úr Eurovision í kjölfar innrásarinnar í Úkraínu í febrúar 2022 og hefur ekki fengið að taka þátt síðan.

„Við höfum lengi bent á það hversu óeðlilegt það er að Ísrael taki þátt í þessari keppni. Þau hafa stundað þarna þjóðernishreinsanir í meira en 75 ár og það hefur kannski vakið um sérstaklega mikil viðbrögð núna, einmitt vegna þess að það kom mjög skýrt fram að Rússlandi hafi verið vikið úr keppni vegna innrásarinnar í Úkraínu,“ segir Sema. 

„Eðli málsins samkvæmt á það sama að gilda um Ísrael og við vitum ekki til þess að gildi keppninnar hafi breyst á milli ára. Ef Rússar brutu þessi gildi eru Ísraelar að gera það líka. Ísraelsríki er þegar byrjað að nota undankeppnina hjá sér til þess að hvítþvo ísraelska herinn og aðgerðir þeirra í Palestínu. Það er ekki við öðru að búast þegar þeir stíga á svið í Svíþjóð.“

„Alltaf verið feimni að láta Ísrael svara fyrir gjörðir sínar“

Sama eigi að gilda um Ísrael, sem sé þegar farið að nota keppnina til að mála her sinn í góðu ljósi. Hún segir óskiljanlegt að aðrar reglur gildi um Ísrael en Rússland.

„Þetta er fyrst og fremst hræsni og ekkert annað. Það hefur alltaf verið feimni við að láta Ísrael svara fyrir gjörðir sínar, í öll þessi ár. Við sjáum það bæði með Eurovision og annað á alþjóðavettvangi að það er ekki mikið um slíkt, því miður.“