Häcken tapaði niður tveggja marka for­ystu

Leikurinn var sá fyrri í einvígi liðanna en sigurvegari einvígisins fer áfram í riðlakeppni Evrópudeildarinnar. Liðið sem tapar fer hins vegar í riðlakeppni Sambandsdeildarinnar.

Häcken fór vel af stað í dag. Amor Layouni skoraði fyrsta mark leiksins á 36. mínútu og það virtist sem sænsku meistararnir ætluðu að koma sér í góða stöðu fyrir síðari leikinn þegar Ibrahim Sadiq skoraði úr víti rúmum tuttugu mínútum fyrir leikslok.

Þá fór hins vegar allt í skrúfuna hjá heimamönnum. Bojan Miovski minnkaði muninn fyrir Aberdeen á 75. mínútu og aðeins fjórum mínútum síðar jafnaði Nicky Devlin metin.

Til að bæta gráu ofan á svart fékk Johan Hammar rautt spjald hjá Häcken á lokamínútu leiksins. Aberdeen skoraði mark í uppbótartíma en það fékk ekki að standa. Lokatölur 2-2.

Valgeir Lunddal var í byrjunarliði Häcken í dag og lék í stöðu vinstri bakvarðar. Hann var tekinn af velli á 85. mínútu.

Einum öðrum leik er lokið í Evrópudeildinni. Slavia frá Prag vann 2-0 sigur á heimavelli gegn Zorya Luhansk.

Alfons og félagar í vondum málum

Twente er í vondum málum eftir stórt tap gegn Fenerbache á útivelli. Alfons Sampsted var í byrjunarliði Twenter sem náði forystunni á 20. mínútu leiksins. Heimamenn jöfnuðu skömmu síðar og rétt fyrir hálfleik fékk Youri Regeer rautt spjald í liði Twente.

Liðsmenn Fenerbache nýttu sér liðsmuninn heldur betur í síðari hálfleik. Þeir skoruðu hvert markið á fætur öðru og unnu að lokum 5-1 sigur.

Alfons lék allan leikinn í vörn Twente. 

Önnur úrslit í umspili Sambandsdeildarinnar

FC Astana - Partizan Tirana 1-0

Tobol Kostanay - Viktoria Plzen 1-2

Zalgiris - Ferencvaros 0-4

Nordsjælland - Partizan Belgrad 5-0

Farul Constanta - HJK Helsinki 2-1

Levski Sofia - Eintracht Frankfurt 1-1

OSK Sfantu Gheorghe - Bodö/Glimt 2-2

Dynamo Kyiv - Besiktas 2-3

Rapid Vín - Fiorentina 1-0

Maccabi Tel Aviv - NK Celje 4-1