Viðrar frábærlega til gleðigöngu

Í hugleiðingum veðurfræðings Veðurstofunnar segir að hinn fallegasti sumardagur sé í vændum á vesturhelmingi landsins. Austurhelmingur landsins verði hins vegar þungbúinn með lágskýjabreiðu sem muni lítið brotna upp. Hægur vindur verður á mest öllu landinu, nema austast þar sem verður norðan strekkingur.

Hitinn fer því lítið yfir 10 stig þar sem sólar ekki nýtur en upp undir 20 stig þar sem bjartast verður.

„Á morgun er útlit fyrir að verði enn bjartara en í dag og einnig létti smám saman til fyrir austan líka. Hitinn ætti því að vera heldur hærri en í dag.“

Veðurhorfur á landinu

Norðaustlæg eða breytileg átt, 3-10 m/s. Skýjað á austanverðu landinu og sums staðar súld, en víða léttskýjað vestantil. Léttskýjað um meat allt land á morgun, en áfram skýjað austast. Hiti 8 til 20 stig, hlýjast suðvestantil.

Á mánudag:

Hæg vestlæg eða breytileg átt og víða bjartviðri, en víða skýjað með suðurströndinni. Hiti 10 til 20 stig, hlýjast um landið norðanvert.

Á þriðjudag, miðvikudag og fimmtudag:

Fremur hæg suðlæg eða breytileg átt. Skýjað að mestu og dálítil væta öðru hverju, en yfirleitt þurrt norðaustanlands. Hiti 10 til 19 stig, hlýjast inn til landsins.

Á föstudag:

Útlit fyrir vaxandi norðaustanátt með rigningu, einkum austanlands og áfram hlýtt í veðri.

Á laugardag:

Austlæg átt, rigning með köflum og hlýindi.