Færeyingar byrjuðu á enn einum jarðgöngum í dag

Kristján Már Unnarsson skrifar 8. maí 2023 20:44

Formaður bæjarráðs og bæjarstjóri Þórshafnar, þeir Tróndur Sigurdsson og Heðin Mortensen, hleyptu verkinu af stað með fyrstu sprengingu í dag. Kringvarpið

Færeyingar hófu í dag að grafa enn ein jarðgöngin, að þessu sinni tveggja kílómetra innanbæjargöng í jaðri Þórshafnar. Þetta þýðir að samtímis er núna verið að grafa sex jarðgöng í Færeyjum, til viðbótar við tvenn sem frændur okkar hafa nýlokið við.

Í fréttum Stöðvar 2 mátti sjá myndir Kringvarps Færeyja af fyrstu sprengingunni í dag en það voru þeir Tróndur Sigurdsson, formaður bæjarráðs Þórshafnar, og Heðin Mortensen bæjarstjóri sem hleyptu henni af stað. Þórshafnarbær samdi við færeyska verktakafyrirtækið Articon um verkið á grundvelli útboðs.

Frá Þórshöfn í Færeyjum. Jarðgöngin opnast í jaðri byggðarinnar.Kringvarpið

Nýju göngin liggja undir fjallið Húsareyn og verða 1,8 kílómetra löng. Þau verða hluti af nýrri sex kílómetra langri aðkomuleið inn í höfuðstaðinn úr norðri og þau fyrstu sem teljast innanbæjargöng í Færeyjum. Kostnaður er áætlaður um 6,6 milljarðar íslenskra króna og greiðir Þórshafnarbær tvo þriðju en landsjóður Færeyja þriðjung kostnaðar.

Norðanmegin munu nýju göngin opnast skammt frá munna Austureyjarganganna, sem tekin voru í notkun fyrir jólin 2020, en þau hafa reynst bylting fyrir samgöngukerfi eyjanna.

Jarðgöngin verða hluti af nýrri aðkomu inn í höfuðstað Færeyja úr norðri.Kringvarpið

Austureyjargöng eru 11,2 kílómetra löng neðansjávargöng en Færeyingar hafa einnig nýlokið gerð nýrra Hvalbiarganga á Suðurey.

Og núna eru þeir að grafa sex önnur göng: Sandeyjargöng, neðansjávargöng milli Straumeyjar og Sandeyjar, við Klakksvík eru að koma tvenn ný göng, Árnafjarðargöng og Hvannasundsgöng, á Sandey er verið að grafa Dalsgöng, á Suðurey stutt Fámjinsgöng og núna bætast við Húsareynsgöng við Þórshöfn og eiga öll þessi göng að klárast á næstu tveimur árum.

Jarðgöngin í Færeyjum sem verið er að grafa eða nýlokið er við.Grafík/Kristján Jónsson

Samtals eru Færeyingar þannig að fá átta ný jarðgöng á fimm ára tímabili. Hérlendis hafa ein ný göng, Dýrafjarðargöng, bæst við vegakerfið á síðustu árum. Niðurstaða þessa samanburðar: Ein göng á Íslandi á móti átta í Færeyjum. Og ef aðeins eru tekin þau göng sem verið er að grafa núna er staðan þessi: Ísland 0 - Færeyjar 6.

Hér má sjá frétt Stöðvar 2:

Færeyjar Samgöngur Vegtollar Vegagerð Byggðamál

Tengdar fréttir

Óvissa um næstu jarðgöng og hvernig þau verða fjármögnuð

Innviðaráðherra vill ekkert segja um það hvenær hægt verður að bjóða út næstu jarðgöng á Íslandi né hvort hann leggi til í nýrri samgönguáætlun að Fjarðarheiðargöng verði næst í röðinni. Óvissa ríkir um fjármögnun.

6. maí 2023 06:12

Annasamt verkefni að flytja jarðgangafréttir í Færeyjum

Sá sem skrifar fréttir af gangi jarðgangaverkefna í Færeyjum í vef Landsverks, vegagerðar þeirra Færeyinga, hefur sannarlega frá nógu að segja þessa dagana. Svo mikil er atorkan hjá frændþjóð Íslendinga í að bæta samgöngukerfi sitt með fleiri jarðgöngum.

19. nóvember 2022 14:20

Jarðgöngin koma í röðum, þau næstu fyrir áttatíu íbúa

Ekkert lát ætlar að verða á jarðgangaborunum Færeyinga. Fyrir tveimur vikum fögnuðu þeir fyrstu sprengingu nýrra Árnafjarðarganga. Samtímis er hafið útboðsferli á göngum til Fámjins, áttatíu manna byggðar á Suðurey.

17. október 2021 06:27

Færeyingar grafa fern jarðgöng á sama tíma

Færeyingar hófu í vikunni framkvæmdir við tvenn ný jarðgöng, til viðbótar við þrenn önnur sem verið er að grafa eða nýlokið er við. Áður var búið að grafa nítján jarðgöng í Færeyjum.

11. febrúar 2021 22:30

Þriggja arma neðansjávargöng bylta samgöngum í Færeyjum

Færeyingar fögnuðu um helgina opnun stærsta samgöngumannvirkis eyjanna, Austureyjarganganna, neðansjávarganga milli Straumeyjar og Austureyjar, sem lýst hefur verið sem mestu samgöngubyltingu í sögu Færeyja.

21. desember 2020 22:21

Segir Færeyjar verða stærri með göngum

Færeyingar hafa verið sex sinnum afkastameiri en Íslendingar í jarðgangagerð, - ein göngin grófu þeir fyrir fimmtán íbúa, - og nú áforma þeir fimm ný jarðgöng. Fjármálaráðherrann þeirra segir að ef bara ætti að hugsa um hagkvæmni væri best að hafa alla Færeyinga í einni blokk. Öflugt þjóðvegavegakerfi er með því fyrsta sem Íslendingur á ferð um Færeyjar tekur eftir. Hver einasti kílómetri er malbikaður. Engir malarvegir.

24. mars 2013 19:14