Væri búin að taka RÚV af aug­lýsinga­markaði væri það lausnin

Tilkynnt var um það í dag að útgáfu Fréttablaðsins og útsendingum Hringbrautar hafi verið hætt. Sigmundur Ernir Rúnarsson, síðasti ritstjóri Fréttablaðsins og einn þeirra um eitt hundrað sem misstu vinnuna í dag, sagði í dag að dagurinn væri sorgardagur fyrir íslensku þjóðina og lýðræðið í landinu. 

Þá hafa gagnrýnisraddir vegna stuðnings, eða skorts á stuðningi, yfirvalda við einkarekna fjölmiðla.

„Það er þverpólitísk sátt um að hlúa að einum fjölmiðli sem er ríkisfjölmiðillinn. Hinir mega svo gott sem eiga sig. Það þekkja allir sem reka einkarekna fjölmiðla í dag að það er mjög hart sótt að þeim af hinu opinbera,“ sagði Sigmundur Ernir til að mynda.

Þá líkir framkvæmdastjóri miðla hjá Símanum veru Ríkisútvarpsins á auglýsingamarkaði við engisprettuplágu.

Lilja Dögg Alfreðsdóttir, sá ráðherra sem fjölmiðlamál heyra undir, mætti í sett í kvöldfréttum Stöðvar 2 til þess að ræða fall Fréttablaðsins. Hún segir að ekki hafi myndast pólitísk sátt um það að taka RÚV af auglýsingamarkaði og að búið væri að gera það ef það væri lausn við vanda fjölmiðla. Erlendir miðlar séu miklu frekar það sem taki auglýsingatekjur frá íslenskum miðlum.

Vill ríkið af auglýsingamarkaði 

Lilja segir að í nýrri fjármálaáætlun séu tekin skref til þess að styrkja rekstur einkarekinna fjölmiðla. Til að mynda verði styrkir til þeirra hækkaðir og kerfi verði komið á laggirnar sem hvetji fólk til þess að verða áskrifendur að fjölmiðlum. Þannig sé sama leið farin og í nágrannaríkjum okkar.

Hins vegar hafi ríkisfjölmiðlar á Norðurlöndunum ekki verið á auglýsingamarkaði líkt og RÚV hefur alla tíð verið.

„Ég ætla ekki að fara að verja það varðandi RÚV, og bara til að segja þér alveg eins og er, ég mundi telja að það væri miklu æskilegra að ríkið væri ekki á þessum markaði. Hins vegar er bara ekki sátt um það og ég verð að sætta mig við það,“ segir Lilja en neitar að gefa upp hvar málið strandi innan ríkisstjórnarinnar.

Tekjuöflunarmódelið gangi ekki upp lengur

Lilja segir að núverandi tekjuöflunarmódel fjölmiðla gangi ekki lengur upp, hvorki hér á landi né erlendir. Erlendir miðlar ryksugi upp auglýsingatekjur og vera RÚV á auglýsingamarkaði hafi ekki mikil áhrif. Til að mynda fari 73 prósent af öllum auglýsingatekjum í Svíþjóð út fyrir landsteinana.

Ef það væri lausnin að við mundum taka RÚV af auglýsingamarkaði, þá værum við löngu búin að gera það. Frakkar og Spánverjar fóru í þessar aðgerðir og veistu hvað gerðist? Þetta fór ekkert inn á innlendu miðlana. Þetta fór líka á Facebook og Google. Ef ég hefði verið sannfærð um það, Sindri, að þetta væri lausnin, þá hefði ég gert það,“ segir Lilja.