Maðurinn sem leiddi Króata til bronsverðlauna á HM 1998 látinn

Blazevic tók við króatíska landsliðinu 1994, nokkrum árum eftir að landið fékk sjálfstæði. Undir hans stjórn varð Króatía fljótlega eitt sterkasta lið heims.

Króatar komust í átta liða úrslit á EM 1996, á sínu fyrsta stórmóti sem sjálfstæð þjóð. Á HM tveimur árum seinna gerði Króatía enn betur og vann til bronsverðlauna. Meðal aðalmannanna í liðinu má nefna Davor Suker, sem var markahæstur á HM, Zvonimir Boban og Robert Prosinecki.

Þjálfaraferill Blazevic hófst 1968 og lauk ekki fyrr en 2015. Hann kom víða við og þjálfaði um allan heim, meðal annars í Grikklandi, Frakklandi, Íran, Sviss og Kína.