Takast á um félagatalið í dómsal í dag

Ríkissáttasemjari lagði fram miðlunartillöguna í síðustu viku en Efling hefur neitað að afhenda félagatal sitt svo hægt sé að hefja atkvæðagreiðslu um hana. Héraðsdómur mun taka málið fyrir klukkan korter yfir eitt.

Efling undirbýr enn verkfall hátt í þrjú hundruð starfsmanna Íslandshótela. Í kvöld mun niðurstaða atkvæðagreiðslu um verkfallsboðun Eflingar liggja fyrir. Verði verkfall, sem hefst 7. febrúar, samþykkt fer samninganefnd Eflingar að skipuleggja næstu verkfallsaðgerðir strax á þriðjudag en þau verkföll myndu þá hefjast 14. febrúar.

Samninganefnd Eflingar hefur um helgina farið á hótel Íslandshótela í Reykjavík til að funda með félagsmönnum sínum um miðlunartillöguna. Sólveig Anna Jónsdóttir formaður Eflingar sagði í fréttum okkar í gær að að atvinnurekendur hafi tekið misvel í þær heimsóknir. Verið sé að reyna með mjög markvissum hætti að knýja fram niðurstöðu í atkvæðagreiðslu sem sé atvinnurekendum þóknandi. 

„Auðvitað höfum við því miður heyrt ýmsar sögur af ógnandi og kúgandi tilburðum þar sem verið er að reyna að segja fólki fyrir verkum. Þar sem verið er að reyna með mjög markvissum hætti að knýja fram niðurstöðu í atkvæðagreiðslu sem er atvinnurekendum þóknandi. Það er auðvitað mjög leiðinlegt,“ sagði Sólveig Anna í fréttum okkar í gær.

Þá sakaði Sólveig Samtök atvinnulífsins um ólögleg afskipti af atkvæðagreiðslunni um verkfallið á RÚV í morgun.

Forstjóri Íslandshótela vildi ekki veita viðtal vegna málsins fyrir hádegisfréttir og ekki heldur Halldór Benjamín Þorbergsson framkvæmdastjóri Samtaka atvinnulífsins. 

Halldór sagði yfirlýsingar Sólveigar ekki svaraverðar. Hún sjái óvini í hverju horni.