Ó­líkt mat á verk­falls­vilja hótel­starfs­fólks

Ríkissáttasemjara ber að boða samningsaðila til fundar að minnsta kosti á tveggja vikna fresti eftir að viðræðum hefur verið slitið og það gerði hann í dag. Eftir stuttan fund Eflingarfólks í eigin röðum var gengið til sameiginlegs samningafundar sem aðeins stóð yfir í um mínútu.

Halldór Benjamín Þorbergsson framkvæmdastjóri Samtaka atvinnulífsins segir stál í stál í viðræðunum.

„Ég hef aldrei setið svona stuttan fund á ævi minni. Hugsa að fáir hafi orðið þeirrar gæfu aðnjótandi. Auðvitað er þessi deila kominn í algeran hnút, Gordíóns hnút. Við sjáum enga lausn í þessari deilu eftir þennan fund," segir Halldór Benjamín.

Atkvæðagreiðsla starfsmanna Fosshótela og Íslandshótela um aðgerðirnar hófst á hádegi og stendur til klukkan átta á mánudagskvöld, hjá þeim tæplega þrjú hundruð starfsmönnum sem fara í verkfall hinn 7. febrúar náist ekki samningar.

Sólveig Anna Jónsdóttir formaður Eflingar segir ekkert koma frá SA nema hótanir.

„Sí auknar og ítrekaðar hótanir um hitt og þetta. Sem ég tel að bendi fyrst og fremst til örvæntingar manna yfir því að þessi staða sé kominn upp. En hún er komin upp vegna þess að Samtök atvinnulífsins hafa neitað að virða sjálfstæðan samningsrétt Eflingar. Hafa neitað að nálgast þessar kjarasamningsviðræður í góðri trú,” segir formaður Eflingar.

Framkvæmdastjóri SA segir að ekki væri hægt að taka alla aðra samninga upp vegna Eflingar. Hann hvetji því alla þá sem nú greiði atkvæði um aðgerðir að kynna sér hvað væri í boði samkvæmt SGS samningunum með aðlögun til Eflingar. SA geti einnig gripið til aðgerða eins og verkbanns og skotið efasemdum um lögmæti aðgerðanna til félagsdóms.

„Vegna þess að í gegnum verkfall verður mikið tjón. Við munum nýta öll þau ráð sem eru í verkfærakistunni til að verjast þessum árásum Eflingar."

Munið þið þá fara með þetta fyrir félagsdóm. Getur þú svarað því?

„Mér finnst það ekki útilokað á þessari stundu," segir framkvæmdastjóri SA. Afturvirkni samninga frá 1. nóvember væri algerlega út úr myndinni hjá þeim sem boðuðu og framkvæmdu verkfallsaðgerðir.

„Afturvirkni er ekki í boði í þeim tilvikum. Það er alveg skýrt af okkar hálfu,“ segir Halldór Benjamín.

Sólveig Anna vísar ábyrgðinni á stöðunni hins vegar alfarið til SA.

„Þetta strandar náttúrlega fyrst og fremst á þvermóðsku Samtaka atvinnulífsins til að viðurkenna að kjör verka- og láglaunafólks á höfuðborgarsvæðinu eru óþolandi og úr þeim verður að bæta,“ segir hún.

Aðalsteinn Leifsson ríkissáttasemjari segir að oft hafi tekist að ná upp samtali í kjaraviðræðum við mjög erfiðar aðstæður en ekki í þetta skipti.

„Og það er á ábyrgð okkar allra að reyna að ná því samtali og finna einhverja sanngjarna sátt sem aðilar geta lifað með. En eins og staðan er núna er þetta í algerum hnút,“ segir Aðalsteinn. Eins og er væri til lítils að boða til annars samningafundar.

Ríkissáttasemjari verður hins vegar að boða til fundar eftir hálfan mánuð, sem er 7. febrúar. Sama daginn og aðgerðir eiga að hefjast verði þær samþykktar í yfirstandandi atkvæðagreiðslu.

Verkfallsboðun þegar valdið hótelunum skaða

Á sama tíma og stálin stinn mætast við samningaborðið undirbúa eigendur sjö Foss- og Íslandshótela sig fyrir komandi aðgerðir. Davíð Torfi Ólafsson forstjóri hótelanna segir boðun aðgerðanna þegar hafa haft skaðleg áhrif á reksturinn en heldur enn í vonina um að samningar náist í tæka tíð.

Hann telur verkfallsvilja síns starfsfólks ekki mikinn, það hefði viljað fá að greiða atkvæði um samninga Starfsgreinasambandsins eins og önnur aðildarfélög þess. Aðgerðir muni hins vegar hafa mikil áhrif.

„Ef það verður mun það hafa víðtæk áhrif hjá okkur."

Hversu fljótt, þetta eru sjö hótel undir ykkar merkjum?

„Það er bara eftir einhverja daga. Þá er mjög ólíklegt að við getum haldið úti starfseminni á öllum hótelunum. Það er bara þannig," segir forstjóri hótelanna sjö.

Þarna vísar Davíð Torfi til þess að eigendur og hópur yfirmanna geti gengið í störf fólks í verkfalli. Þeim hafi tekist að ræsta og halda öllum hótelunum opnum í fyrri aðgerðum Eflingar.

„Við verðum bara að vona og ég er alltaf að vona að það komi ekki til verkfalls.“

En auðvitað eru hótel með bókanir fram í tímann og þið þurfið að hugsa fram í tímann, er þetta kannski nú þegar búið að hafa áhrif á starfsemina?

"Já það er búið að gera það. Við auðvitað undirbjuggum okkur fyrir þetta og lokuðum fyrir bókanir á ákveðnum dögum. Þannig að það er búið að hafa heilmikil áhrif,” segir Davíð Torfi.

Mörgum þætti ósanngjarnt að aðgerðirnar beindust eingöngu gegn þessum hótelum. Starfsfólkið væri ekki spennt að fara í verkfallsaðgerðir.

„Nei, þvert á móti. Fólkið mitt hefur engan áhuga á að fara í verkfall. Það hefði miklu heldur viljað fá að greiða atkvæði um SGS samninginn. Miklu, miklu frekar. Láta þá alla eflingarfélaga gera það frekar en að ráðast í raun á eitt fyrirtæki og setja fólk í þessa stöðu,” segir Davíð Torfi Ólafsson.