Sér­fræðingur í lestar­málum segir að­stæður hér á landi sér­lega góðar fyrir lest

Umræða um lestarsamgöngur sprettur reglulega upp, nú síðast í desember þegar um þrjátíu þúsund manns lentu í vandræðum fjórum dögum fyrir jól þegar Reykjanesbrautinni var lokað vegna veðurs og slæmra akstursskilyrða.

Yacine er franskur byggingarverkfræðingur sem flutti hingað til lands fyrir ári síðan og hefur fimmtán ára reynslu af samgöngum og lestarframkvæmdum. Þegar hann var spurður út í gæði samgöngukerfisins á Íslandi kom fát á hann.

„Ég skal reyna að vera hreinskilinn...“

Okkar maður átti raunar erfitt með að segja margt gott um almenningssamgöngur hér á landi en telur mjög raunhæft að koma lestarkerfi á fót enda séu skilyrði hér með eindæmum góð.

„Það sem stendur lestarkerfum helst fyrir þrifum er mikill hiti, þ.e. hitabylgjur og lauf af trjám, einkum á haustin. Hvorugt er fyrir hendi á Íslandi.“

Snjóþyngsli ættu ekki að valda vandræðum

Þá ættu snjóþyngsli ekki að hafa áhrif á lestarsamgöngur enda gangi þær upp án vandræða í Kanada, Noregi og Rússlandi svo dæmi séu tekin.

Lest sem ferðast hringinn í kringum landið sé þó óraunhæf hugmynd.

„Það er mjög erfitt að grafa í íslenskum jarðvegi en það er nauðsynlegt vegna staðhátta hér. Best væri að huga fyrst að tvöföldum teinum frá Keflavík til Reykjavíkur sem færi í gegnum Hafnarfjörð og Kópavog.“

Hugmyndir um neðanjarðarlest hér á landi séu þó of kostnaðarsamar.

„Ofanjarðarlest sem fær orku úr raflínum væri besta lausnin.“

Er pláss fyrir lest í borginni?

Í sjónvarpsfréttinni má sjá hvernig allt umstang í kringum rafknúnar lestar lítur út. Aðspurður hvort svona flykki komist hreinlega í borgina svarar hann því til að lest þurfi ekki að taka mikið pláss.

„Teinastæði fyrir hraðlestar er ekki nema 10 metra breitt. Það getur verið mjórra og er oft mjórra þegar um hraðlestar er að ræða.“

Slík lest gæti ferðast á 120 kílómetra hraða í borginni.

Félagið Kadeco leiðir samstarf um skipulag og þróun lands við Keflavíkurflugvöll. Framkvæmdastjóri félagsins tekur undir með Yacine og segir algjörlega raunhæft að koma á fluglest.

„Að mínu mati er þetta spurning um hvað við gerum þangað til. Á meðan við bíðum efti lestinni og við höfum nokkrar hugmyndir varðandi það. Hvernig bæta má almenningssamgöngurnar á milli þessara tveggja svæða,“ segir Pálmi Freyr Randversson, framkvæmdastjóri Kadeco.

Samtengja rútur við borgarlínukerfi

Hann segir að það sem liggur mest á sé tvöföldun Reykjanesbrautar, þannig kæmust almenningssamgöngur í hálfgerðan forgang.

„Það væri sömuleiðis hægt að gera styttri leiðir til dæmis frá flugstöð inn á Reykjanesbraut, það væri hægt að greiða leiðina fyrir utan flugstöðina, norðan við flugstöðina og svo væri mögulega hægt að samtengja rúturnar við borgarlínukerfið á höfuðborgarsvæðinu á meðan við erum að bíða.“

Þetta þurfi allt að gera með það í huga að slík framkvæmd muni ekki hindra möguleika lesta til framtíðar.

Eiga ekki endilega að vera arðbærar

En svo er það kostnaðurinn, margir hafa efasemdir um ágæti framkvæmdarinnar vegna hans. Yacine segir framkvæmdina vissulega kostnaðarsama.

„Kostnaðurinn mun standa í mörgum hér, og nú verða margir hissa en almenningssamgöngur eiga ekki endilega að vera arðbærar. Almenningssamgöngur eru víða reknar eins og einkafyrirtæki og það er einmitt nauðsynlegt að koma fólki milli staða. Þess vegna þarf ríkið að koma að borðinu svo dæmið gangi upp. Stundum eru almenningssamgöngur arðbærar. Í Frakklandi er hraðlestakerfið arðbært þótt kostnaður sé mikill.“