Fimmtíu ár á götunni en skarar ennþá fram úr

James Einar Becker er stjórnandi þáttanna, Tork gaurinn sjálfur. Hann fékk gullfallega blæjubílinn Mercedes Benz SL 450 að láni á síðasta degi sumars. Dagurinn hentaði vel í bíltúr á kagganum, sólin skein og James brunaði um sveitina með blæjuna niðri.

Króm og aftur króm

Benzinn er orðinn fimmtíu ára gamall en hefur verið haldið gríðarlega vel. Hönnunin er einstök og tímalaus.

„Allt þetta króm! Þessi bíll er smíðaður á þeim tíma þegar króm var eitt það nauðsynlegasta til að hafa á bílum,“ segir James.

Hann er mjög hrifinn af bílnum og því hvernig honum hefur verið haldið við. Hann segir jafnvel ekki víst að nýjustu bílarnir úr SL-línu Mercedes eigi eftir að duga svona lengi og ná því að vera á götunni eftir fimmtíu ár.