Uwe Seeler látinn

Seeler skoraði 43 mörk í 72 leikjum fyrir vestur-þýska fótboltalandsliðið og var fyrirliði liðsins í 40 leikjum. Hann lék á fjórum heimsmeistaramótum, meðal annars á HM 1966 þegar liðið varð í 2. sæti og á HM 1970 þegar liðið varð í 3. sæti. Seeler varð fyrstur í sögunni til að skora á fjórum heimsmeistaramótum.

Hann lék allan sinn feril með Hamburg og skoraði alls 490 mörk í 580 leikjum, á árunum 1954-1972. Seeler er markahæstur í sögu félagsins og var gerður að heiðursborgara í Hamborg árið 2003.

„Við munum aldrei gleyma honum og alltaf hafa hann í miklum metum,“ sagði Jonas Boldt, stjórnarmaður knattspyrnufélagsins Hamburg.

„Uwe Seeler hafði allt sem prýða kann góða manneskju: Jarðbundinn, tryggur, lífsglaður og alltaf opinn fyrir samskiptum. Hann stendur fyrir allt sem HSV vill standa fyrir,“ sagði Boldt.

Seeler var í þrígang valinn knattspyrnumaður ársins í Þýskalandi, á árunum 1960, 1964 og 1970, og varð í þriðja sæti í kjörinu um Gullknöttinn árið 1960.

Pele, sem lék á sömu fjórum heimsmeistaramótunum og Seeler, valdi Seeler árið 2004 sem einn af 125 bestu knattspyrnumönnum sögunnar sem enn væru á lífi.