Herða sóttvarnareglur yfir jólin eftir mikinn fjölda smita

Samkvæmt frétt ESPN hafa 52 leikmenn og tveir þjálfarar þurft að taka sér hlé frá æfingum og leikjum vegna kórónuveirunnar í desember. Hópsmit hafa komið upp hjá fimm félögum; Brooklyn Nets, Charlotte Hornets, Chicago Bulls, LA Lakers og Sacramento Kings.

Hertar sóttvarnareglur taka gildi á öðrum degi jóla, 26. desember, þegar smitprófum verður fjölgað og kröfur auknar um grímunotkun.

Þeir sem fengið hafa aukasprautu af bóluefni fyrir meira en 14 dögum, eða eru nýlega búnir að jafna sig af veirusmiti, eru undanþegnir hertari kröfum.

Alls 22 leikmenn hafa þurft að taka sér hlé vegna smita á síðustu tveimur sólarhringum.

Tveimur leikjum frestað í vikunni

Aðeins tveimur leikjum hefur þó verið frestað í þessari viku og í báðum tilfellum voru það leikir Chicago Bulls – gegn Detroit Pistons á þriðjudagskvöld og gegn Toronto Raptors í nótt.

Fjórir leikir fóru fram í nótt þar sem meðal annars Brooklyn Nets unnu Philadelphia 76ers, 114-105. Kevin Durant tók til sinna ráða í lokafjórðungnum, þegar Brooklyn tryggði sér sigurinn, og endaði með 34 stig, 11 fráköst og 8 stoðsendingar.

Phoenix Suns hélt áfram að salla inn sigrum þegar liðið vann Washington Wizards af öryggi, 118-98. Phoenix hefur unnið 23 af 28 leikjum sínum og er jafnt Golden State Warriors á toppi vesturdeildarinnar. Brooklyn er efst í austurdeildinni með 21 sigur og 8 töp.

NBA er á Stöð 2 Sport en upplýsingar um útsendingar má finna hér. NBA körfuboltinn er hluti af Stöð 2 Sport erlent sem kostar 3.990 krónur á mánuði.