„Nú er síðasti séns, kæru vinir“

Hringborðið var sett í dag og er það fyrsti stóri alþjóðlegi viðburðurinn um málefni Norðurslóða síðan heimsfaraldurinn hófst. Yfir 100 málstofur með fleiri en 400 ræðumönnum eru á dagskrá þingsins. Leiðtogar þjóða, fyrirtækja, umhverfissamtaka, vísindastofnana o.fl. munu flytja ræður í Hörpunni.

Sturgeon vakti lukku með athyglisverðri staðreynd

Nicola Sturgeon, forsætisráðherra Skotlands var á meðal þeirra sem héldu erindi í dag og vakti það nokkra lukku þegar hún sagði að styttra væri frá N-Skotlandi til Norðurheimskautsins en til London. Þá hlaut yfirlýsing Naaja Nathanielsen, ráðherra í ríkisstjórn Grænlands, mikið lófaklapp þegar hún tilkynnti að Grænlendingar hyggðust ekki nýta olíu- og gasauðlindir sem þar kunna að finnast.

„Það hafa margar yfirlýsingar komið fram hér í dag sem sæta miklum tíðindum. Hvort sem það er þessi stefnumótun Skotlands sem að er líka mikið fagnaðarefni fyrir okkur Íslendinga og þáttaskilin sem eru að verða í Grænlandi eru slík að það verður meginverkefni okkar Íslendinga á næstu árum að taka þátt í því með Grænlendingum, færa okkur saman yfir í þessa nýju veröld,“ sagði Ólafur Ragnar Grímsson, fyrrverandi forseti Íslands og formaður Hringborðins í beinni útsendingu í fréttum Stöðvar 2 í kvöld í viðtali við Heimi Má Pétursson fréttamann.

Sagði Ólafur Ragnar að Ísland væri að festa sig í sessi sem sá samkomustaður þar sem veröldin kemur saman til að ræða norðurslóðir. Þetta sæist til dæmis í góðri mætingu af hálfu embættismanna Bandaríkjastjórnar.

„Svo fannst mér líka skipta máli þessar ræður og svör fulltrúa Bandaríkjanna sem að hér voru. Það sýndi okkur að það hafa orðið ákveðin þáttaskil í Washington með nýrri ríkisstjórn. Hér voru allir helstu fulltrúar nýrrar ríkisstjórnar ásamt öflugum öldungardeildarþingmönnum. Þannig að dagurinn í dag að heimsmyndin er að breytast og Ísland er að festa sig í sessi sem sá samkomustaður þar sem veröldin vill koma saman og ræða norðurslóðir,“ sagði Ólafur Ragnar.

„Skilaboðin hér eru að við höfum ekki meiri tíma“

Ræðu Sturgeon var beðið með nokkurri eftirvæntingu þar sem hún var síðasta stefnumótandi ræðan sem forsætisráðherra Skotlands flutti í aðdraganda loftslagsráðstefnu Sameinuðu Þjóðanna í Glasgow í byrjun nóvember. Þing Hringborðs Norðurslóða er af mörgum þátttakendum nýtt sem undirbúningur undir COP26 fundinn í Glasgow. Heimir Már spurði Ólaf Ragnar hver skilaboðin yrðu frá Hringborðinu inn á hið mikilvæga þing.

„Skilaboðin hér eru að við höfum ekki meiri tíma. Ísinn er að bráðna, jöklarnir eru að bráðna. Veðurfarið á jörðinni eru að breytast. Þeir sem ekki átta sig á því að norðurslóðir eru vitnisburður um það hvað er í húfi, þeim er eiginlega ekki viðbjargandi. Þannig að skilaboðin héðan til Glasgow eru: Nú er síðasti séns, kæru vinir til þess að sýna alvarlegar aðgerðir.“