Írarnir Greal­ish og Rice í aðal­hlut­verki hjá enska lands­liðinu

Báðir hafa spilað stóra rullu það sem af er EM en enska liðið er komið alla leið í undanúrslit mótsins.

Rice og Grealish eru ekki einsdæmi í enska landsliðinu. Til að mynda eiga Kyle Walker og Raheem Sterling ættir að rekja til Jamaíka. Foreldrar Jadon Sancho koma frá Trínidad & Tóbagó og þá á Harry Kane einnig ættir að rekja til Írlands.

Tvíeykið sem nefnt er hér að ofan sker sig hins vegar úr því þeir léku báðr með yngri landsliðum Írlands og voru hársbreidd frá því að leika mótsleik með A-landsliðinu. Það hefði þýtt að þeir gætu ekki skipt um þjóðerni - inn á knattspyrnuvellinum þar að segja. 

Raunar lék Rice þrjá A-landsleiki en allt voru vináttulandsleikir og þar sem hann var ekki orðinn 21 árs er hann lék leikina gat hann skipt út grænni treyju Írlands fyrir hvíta treyju Englands.

Rice var duglegri að ræða írska forfeður sína og sagði árið 2018 að það augnablik sem hefði fyllt hann hvað mestu stolti á lífsleiðinni hefði verið þegar hann stóð tárvotur inn á knattspyrnuvelli að hlusta á írska þjóðsönginn fyrir leik gegn Tyrklandi í mars sama ár. 

Þá kyssti Rice merkið er hann skoraði fyrir U-21 árs landslið Írlands. Sjá má atvikið hér að neðan, það kemur eftir tæpar 30 sekúndur.

Á endanum – stuttu eftir að England komst í undanúrslit á HM í Rússlandi og Rice hafði beðið um að vera ekki valinn í leik Írlands í Þjóðadeildinni – tók hinn ungi miðjumaður West Ham United ákvörðun sem hann lýsir sem þeirri erfiðustu á ferli sínum.

Hann ákvað að stökkva á Gareth Southgate-hraðlestina og sér ekki eftir því í dag þó svo að hann vilji eflaust ekki hitta Kevin Kilbane, fyrrum írskan landsliðsmann, í dimmu húsasundi.

Rice grætur sig þó eflaust ekki í svefn þar sem hann er lykilmaður í ensku landsliði sem á fína möguleika á að vinna sitt fyrsta stórmót síðan England varð heimsmeistari árið 1966.

Ekki var það auðveldara fyrir Grealish en á þeim tíma sem hann var að íhuga landsliðsframtíð sína var Roy Keane aðstoðarþjálfari þar sem Grealish spilaði, hjá Ston Villa. Keane, fyrrum fyrirliði Írlands, er ekki þekktur fyrir að liggja ekki á skoðunum sínum og sagði Grealish oftar en einu sinni að hann ætti að velja Írland.

Grealish hefur augljóslega ekki hlustað á hinn geðþekka Íra og valdi á endanum að spila fyrir England. Það tók þó sinn tíma að taka þá ákvörðun.

Grealish var hluti af yngri landsliðum Írlands og þegar hann var 19 ára gamall, árið 2015, virtist sem hann yrði valinn í A-landsliðið. Allt kom fyrir ekki, Grealish gaf ekki kost á sér og tók í kjölfarið ársfrí frá landsliðsfótbolta.

Árið 2016 var hann svo valinn í enska U-21 árs landsliðið og þá var ekki aftur snúið. Hann spilaði sjö leiki með liðinu og spilaði svo sinn fyrsta A-landsleik árið 2020. Þó hann hafi aðeins verið í byrjunarliði Englands einu sinni til þessa á Evrópumótinu þá hefur hann nýtt mínútur sínar vel.

Hann lagði upp sigurmark Englands í eina leiknum sem hann hefur byrjað, gegn Tekklandi í lokaleik riðlakeppninnar. Grealish kom inn af bekknum gegn Þýskalandi í 16-liða úrslitum og átti stóran þátt í fyrra marki Englands ásamt því að leggja upp síðara markið á Harry Kane í öruggum 2-0 sigri.

Írar gráta sig mögulega enn í svefn að þessir tveir hæfileikaríku leikmenn hafi ákveðið að spila fyrir England en þeir tveir sjá eflaust ekki eftir ákvörðun sinni. Declan Rice og Jack Grealish geta hjálpað Englandi að komast í úrslit EM á morgun er Danmörk mætir á Wembley.

Leikur Englendinga og Dana hefst klukkan 19.00 á morgun og er í beinni útsendingu Stöðvar 2 Sport. Upphitun hefst 40 mínútum fyrir leik eða klukkan 18.20.

EM 2020 verður sýnt á Stöð 2 Sport EM 2020 sem er hluti af Sportpakkanum, Stóra pakkanum og Risapakkanum. EM 2020 er einnig hægt að kaupa stakt á lækkuðu verði frá og með 24. júní á kr. 3.990.