Gæti óvænt snúið aftur á EM eftir langt hlé vegna kynlífsmyndbandskúgunar

Þetta segir franski miðillinn L'Equipe í dag. Blaðið segir þó ljóst að endurkoma Benzema kæmi mjög á óvart en hann hefur ekki verið valinn í franska landsliðið síðan árið 2015.

Benzema missti þannig af EM 2016, þegar Frakkar unnu silfur, og HM 2018 þar sem Frakkar unnu gull. Aðalástæða þess að hann hefur ekki verið valinn síðustu ár er þáttur hans í að fjárkúga Mathieu Valbuena, þáverandi félaga hans í landsliðinu, með hótunum um að birta kynlífsmyndband af Valbuena.

Benzema hefur aftur á móti verið lykilleikmaður hjá Real Madrid í mörg ár. Frá því að hann datt út úr landsliðinu fyrir hálfu sjötta ári hefur hann meðal annars orðið tvisvar Spánarmeistari og fjórum sinnum Evrópumeistari. Hann var á sunnudaginn valinn besti Frakkinn sem spilar utan heimalandsins.

L'Equipe segir að Deschamps komi til með að velja Antoine Griezmann, Kylian Mbappé, Kingsley Coman, Olivier Giroud, Ousmane Dembélé, Wissam Ben Yedder og Anthony Martial, en að þá verði enn pláss fyrir tvo leikmenn framarlega á vellinum. Thomas Lemar, sem glímt hefur við meiðsli, gæti orðið annar þeirra en Benzema mögulega hinn.

Evrópumótið hefst 11. júní. Frakkar eru í algjörum dauðariðli, riðlinum sem Ísland hefði leikið í ef liðið hefði komist á mótið. Frakkar mæta Þýskalandi í fyrsta leik, 15. júní, því næst Ungverjalandi og loks Portúgal.