Segir að­komu HÍ að rekstri spila­kassa á á­byrgð stjórn­valda og skólans

„Háskóli Íslands, sem æðsta menntastofnun landsins, sem nýtur svona mikils trausts, á ekki að hafa aðkomu að svona rekstri. Eins og rannsóknir sýna benda til þess að þessi spilun hafi víðtækar afleiðingar og áhrif bæði á fólk sem spilar og aðstandendur,“ segir Isabel Alejandra Díaz, forseti Stúdentaráðs í samtali við fréttastofu. Stúdentaráð sendi frá sér ályktun í vikunni þar sem reksturinn var gagnrýndur. 

Málefni spilakassa hafa verið mikið í umræðunni undanfarin misseri en fréttaskýringaþátturinn Kompás fjallaði um málið í desember í fyrra. Þá hafa rekstraraðilar spilakassa hér á landi verið harðlega gagnrýndir en þeir eru margir hverjir hagsmuna- og góðgerðasamtök eins og SÁÁ, Rauði Krossinn og Landsbjörg. SÁÁ hefur þegar dregið sig úr rekstri spilakassa en Rauði Krossinn og Landsbjörg halda enn uppi rekstri Íslandsspila.

„Þetta hefur helst áhrif á viðkvæmustu hópa samfélagsins og ungt fólk. Við teljum að Háskólinn geti ekki verið þátttakandi í þessum rekstri og eigi að sýna samfélagslega ábyrgð með því að slíta allir aðkomu að þessu,“ segir Isabel.

Háskólinn hefur einnig verið harðlega gagnrýndur fyrir rekstur spilakassa en Samtök áhugafólks um spilafíkn hótaði Happdrætti Háskóla Íslands að starfsemin yrði kærð til lögreglu yrði henni ekki hætt.

Isabel segir reksturinn alvarlegan og að Háskólinn ætti ekki að standa í slíkum rekstri. Ábyrgðin liggi þó endanlega hjá stjórnvöldum, sem hafi ekki veitt Háskólanum nægjanlegar fjárveitingar og hafi skólinn því þurft að snúa sér til þessarar leiðar.

„Endanlega ábyrgðin liggur samt hjá stjórnvöldum af því að þetta er ríkisrekin stofnun. Og þó hún sé sjálfstæð þá bera stjórnvöld endanlega ábyrgð á því að fjármagna háskólann. Við höfum verið að beita okkur fyrir viðunandi fjármögnun til Háskólans og þetta sýnir vel að fjármögnunin er ekki viðunandi og er ekki nóg fyrst að háskólinn þarf að reiða á happdrættisfé,“ segir Isabel. 

„Það eru vonbrigði að Háskólinn þurfi að gera það og að stjórnvöld séu ekki að koma að rekstri Háskólans með víðtækari þætti en þetta. Að okkar mati er eins og stjórnvöld hafi sett ábyrgðina á HÍ og HHÍ.“

Skýtur skökku við að Háskólinn standi ekki undir sér án reksturs spilakassa

Starfshópur hefur verið skipaður af dómsmálaráðherra til að leita úrbóta sem hægt sé að gera á lagaumhverfinu til þess að stuðla að ábyrgari spilamennsku. Rektor Háskóla Íslands skipaði í vor starfshóp sem hefur starfsemi Happdrætti Háskólans til skoðunar.

„Okkur finnst samt ljóst að það hefur vantað þennan pólitíska vilja til að taka málið föstum tökum af hálfu stjórnvalda. Háskólinn á auðvitað ekki að koma að svona rekstri en ef hann hættir honum þá stendur Háskólinn ekki fjárhagslega undir sér. Hver ber ábyrgð á því? Endanleg ábyrgð er á stjórnvöldum,“ segir Isabel.

Lilja Alfreðsdóttir, menntamálaráðherra, sagði á fundi velferðarnefndar um málið að hún muni ekki leggjast gegn því að fundnar verði aðrar leiðir til að fjármagna Háskólann. Isabel segir það þó á borði stjórnvalda að ákveða hvort það sé gerlegt.

„En það er líka á ábyrgð Háskólans að segja að hann vilji að það sé skoðað. Að hann vilji ekki reiða sig á happdrættisfé. Háskólinn hefur fjármagnað mikla uppbyggingu með happdrættisfé sem var auðvitað mjög mikilvægt. En við setjum stórt spurningamerki við það að 26 byggingar hafi verið fjármagnaðar með rekstri spilakassa,“ segir Isabel.