Elliði segir tals­­menn Stjórnar­­skrár­­fé­lagsins nota sömu að­­ferð og Trump

Í skoðanagrein sem birtist á Vísi setur hann mótmælin á Austurvelli í kjölfar fjármálahrunsins árið 2008 í samhengi við árás stuðningsmanna Trump á bandaríska þinghúsið síðasta miðvikudag.

„Hinn ömurlegi atburður í Washington þar sem skríll réðst inn í þinghúsið hefur vakið heimsathygli. Það er eðlilegt enda flestu skynsömu fólki ljós sú hætta sem lýðræðinu er búið þegar múgurinn tekur völdin í sínar hendur.“

Segir talsmenn félagsins boða byltingu

„Hér á Íslandi sáum við þetta skýrt eftir fjármálahrunið þegar friðsöm og sjálfsögð mótmæli snerust upp í ofbeldi gegn kjörnum fulltrúum, innrás í þinghúsið, árásir á lögregluna og önnur skrílslæti. Nú boða talsmenn Stjórnarskrárfélagsins byltingu þar sem yfirtaka skal Alþingi og breyta leikreglum samfélagsins í þá átt sem þau telja heppilegri.“

Þá bætir Elliði við að það sé þekkt aðferð að beita fólki sem telji sig vera órétti beitt „til óhæfuverka.“

„Hitler taldi Þjóðverjum trú um að þjóðin væri misrétti beitt og atti henni þannig í hroðaverk, Trump taldi stuðningsmönnum sínum trú um kosningasvik og sendu skríl til árásar við þinghúsið, vinstrimenn á Íslandi héldu því á lofti að Alþingi bæri höfuðorsök á hruninu og breyttu annars réttmætri reiði í heift sem leiddi til ofbeldis. Dæmin eru víða, misalvarleg en eiga það sammerkt að notfæra sér grunnhvatir svo sem reiði til stjórnunar á hóphegðun.“

Þau sem gagnrýni Trump geti ekki stutt framgöngu Katrínar

Elliði sakar talsmenn Stjórnarskrárfélagsins um að nota áðurnefnda aðferð í baráttu sinni og vísar meðal annars til ræðu sem Katrín Oddsdóttir, núverandi formaður félagsins, flutti á Austurvelli þann 22. nóvember 2008.

„Þar boðaði hún að réttkjörin stjórnvöld yrðu sett af með góðu eða illu. Orðrétt sagði hún að þetta yrði gert: „...með því að brjóta þau landslög sem þið hafið sett.... og með því að bera ykkur út úr þeim opinberu byggingum sem þið felið ykkur í ef þess þarf.“ Stuttu síðar var ráðist á þinghúsið, lögreglustöðina og fleira,“ segir Elliði í grein sinni.

„Þeir sem gagnrýna framgöngu Trump geta vart stutt framgöngu Katrínar.“

Ræðu Katrínar, sem var flutt fyrir tíma Stjórnarskrárfélagsins, má finna á vef samtakanna Raddir fólksins. Þar eru aðgerðirnar sem Elliði nefnir sagðar vera meðal þeirra leiða sem fólk geti nýtt til að „kjósa á annan hátt“ ef sitjandi ríkisstjórn myndi ekki efna til kosninga á næstunni.

Sömuleiðis vísar Elliði til orða hæstaréttarlögmannsins Ragnars Aðalsteinssonar sem hann lét falla í Sprengisandi á Bylgjunni í október síðastliðnum.

„Þar lýsti Ragnar því fjálglega að valdarán væri ein möguleg leið til að hann og hans fólk næðu markmiðum um að breyta réttarríkinu í þá átt sem þau telja gæfulega. Orðrétt sagði Ragnar: „Þess vegna verðum við að ná þessu valdi, verðum að ná þessu af þinginu. Ná þessu valdi af stjórnmálamönnunum.“ Og stuttu síðar „ ...ef þjóðin er áköf um að ná til sín þessu valdi sem hún hefur eðli málsins til þess þá verður hún að taka völdin“ og svo: „Það er valdarán, það þarf að sjálfsögðu ekki að vera neitt blóðugt.““

Langflestir stuðningsmenn nýrrar stjórnarskrár til fyrirmyndar

Elliði segir að lokum að það fólk sem hafi mætt á Austurvöll árið 2008 hafi almennt verið til fyrirmyndar og að hið sama megi segja um kjósendur Trumps auk „lang flesta þeirra sem vilja gera breytingu á stjórnarskránni.“

„Það er hinsvegar afar hættulegt þegar leiðtogar eins og Donald Trump, Ragnar Aðalsteinsson, Katrín Oddsdóttir og aðrir popúlistar tala fyrir byltingu, valdaráni og árásum á hornsteina lýðræðissamfélagsins. Þegar þau snúa reiði í heift á forsendum meints óréttlætis og byrja að skilgreina hvenær óréttlætið sé með þeim hætti að ofbeldi sé réttlætanlegt. Þegar þau hvetja til ofbeldis og árása á lýðræðið. Slíkt ber að fordæma. Ekkert réttlætir slíka framgöngu, sama hvert hugðarefnið er og sama hvaðan reiðin er runninn.“