Eng­land og Skot­land saman í riðli annað Evrópu­mótið í röð | Mætast á sama velli

Eftir sigur Skotlands á Serbíu í gær er ljóst að Skotar eru á leið á sitt fyrsta stórmót í knattspyrnu frá árinu 1998. Annað Evrópumótið í röð eru þeir með Englendingum í riðli þó 25 ár séu á milli móta. Það sem meira er, liðin mætast á sama velli og árið 1996.

Í gær tryggði Skotland sér þátttökurétt á Evrópumótinu í knattspyrnu næsta sumar. Sigurinn gat vart verið dramatískari en liðið mætti Serbíu á útivelli í hreinum úrslitaleik um sæti á Evrópumótinu sem fram fer næsta sumar. Að loknum venjulegum leiktíma var staðan 1-1 og það var hún einnig eftir framlengingu.

Því þurfti að grípa til vítaspyrnukeppni þar sem David Marshall – 35 ára gamall markvörður Derby County sem situr um þessar mundir á botni ensku B-deildarinar – reyndist hetja Skota.

Eftir að fyrstu níu spyrnurnar höfðu sungið í netinu var komið að Aleksandar Mitrović. Þurfti hann að skora til að tryggja bráðabana. Marshall varði og eftir að hafa fengið það staðfest frá dómara leiksins að hann hefði ekki farið með báða fætur af línunni þá hreinlega varð allt vitlaust, Skotlands-megin þar að segja.

Skotland tryggði sér þar með þátttöku á sínu fyrsta stórmóti frá árinu 1998 þegar liðið tók þátt á HM í Frakklandi. Tveimur árum áður hafði liðið verið á EM sem fram fór í Englandi.

Það sem meira er, árið 1996 voru Skotland og England saman í riðli – ásamt Hollandi og Sviss. Það sama er upp á teningnum næsta sumar þar sem Skotland og England eru aftur saman í riðli, að þessu sinni ásamt Króatíu og Tékklandi.

Þessir fornu fjendur eru því saman í riðli annað Evrópumótið í röð, þó það séu 25 ár á milli móta. Það sem meira er, þau mætast aftur á Wembley, þjóðarleikvangi Englendinga sem staðsettur er í Lundúnum. Völlurinn hefur farið í gegnum miklar breytingar frá því árið 1996 en heitir þó enn sama nafni.

Stóra spurningin er svo hvort Skotar hefni fyrir tapið frá því 1996. England vann 2-0 þökk sé mörkum frá Alan Shearer og Paul Gascoigne. Í stöðunni 0-0 varði David Seaman - marvörður Englands- vítaspyrnu frá Gary McAllister sem átti heldur betur eftir að snúa leiknum Englandi í dag. Þeir skoruðu tvö mörk í kjölfarið, unnu leikinn og svo síðar meir riðilinn. 

Að sama skapi sátu Skotar eftir með súrt bragð í munninum.  Liðið endaði í 3. sæti riðilsins með fjögur stig líkt og Holland. Bæði lið voru með markatöluna mínus eitt mark en þar sem Hollendingar höfðu skorað fleiri mörk en Skotarnir þá fóru þeir áfram í 8-liða úrslit mótsins.

Þá var Gareth Southgate, núverandi þjálfari enska landsliðsins, í byrjunarliði Englands í leiknum.