Sjö smit greindust við skimun á landa­mærum

Alls greindust sjö með kórónuveiru við skimun á landamærum í gær. Einn greindist með virkt smit, fjórir með mótefni og er beðið eftir niðurstöðu úr mótefnamælingu í tilviki tveggja.

Þetta kemur fram í uppfærðum tölum á vefnum covid.is, þar sem segir ennfremur að ekkert innanlandssmit hafi greinst síðasta sólarhringinn. Þá segir einnig að þeir þrír sem greindust við skimun á landamærun á sunnudag hafi allir verið með mótefni.

Alls eru nú sextán með veirusmit og í einangrun og eru 279 manns nú í sóttkví. Alls hafa 1.873 smit greinst hér á landi frá 28. febrúar.

1.319 sýni voru tekin á landamærunum í gær, 127 á sýkla- og veirufræðideild Landspítalans og 58 hjá Íslenskri erfðagreiningu.