Vara við annarri bylgju eftir hópsmit sem tengt er við einn mann

Moon-Jae in, forseti Suður-Kóreu, hefur varað við að önnur bylgja kórónuveirunnar gæti skollið á fari yfirvöld og landsmenn ekki varlega. Veitingastöðum og börum hefur verið lokað í Seúl á ný eftir að 34 ný tilfelli greindust í gær.

Suður-Kórea hefur verið sett í flokk með Íslandi yfir lönd sem talin eru hafa gripið til árangursríkra aðgerða til að stemma í stigu við kórónuveirufaraldurinn. Smitum hefur farið fækkandi í Suður-Kórea þangað til í gær, þegar 34 ný smit voru tilkynnt.

Smitin eru allmörg rakin til næturlífsins í Seúl og talið er að rekja megi minnst 15 af 34 smitum til 29 ára gamals manns sem fór að skemmta sér í skemmtanahverfi Seúl um síðustu helgi.

Heilbrigðisyfirvöld reyna nú hvað þau geta til að finna og prófa 1,510 einstaklinga sem voru úti á lífinu og talin hafa komist í tæri við smitaða einstaklinga. Í vikunni var slakað á aðgerðum vegna veirunnar en um helgina ákvað borgarstjóri Seúl-borgar að loka veitingastöðum- og börum á ný, til að minnka líkurnar á svokallaðri annari bylgju faraldursins.

Forseti Suður-Kóreu sagði í gær að hin nýju smit væru áminning um að jafnvel þótt faraldurinn væri á niðurleið gætu alltaf komið upp hópsmit. Þannig þyrftu allir að vera á tánum þangað til að endanlega væri búið að ná tökum á faraldrinum.

„Þetta er ekki búið fyrr en þetta er búið,“ sagði Moon-Jae in.