„Það sendu bara allir nektarmyndir af sér“

Ung kona sem varð fyrir stafrænu kynferðisofbeldi á netinu segir að það hafi verið algengt að krakkar sendu hvert öðru nektarmyndir og myndbönd þegar hún var í grunnskóla. Hún tók þátt í því eins og flestir aðrir og lenti í því að vera hótað með dreifingu nektarmynda myndi hún ekki halda áfram að senda myndir.

Í fréttum Stöðvar 2 hefur komið fram að klámneysla er svo mikil meðal ungmenna hér á landi að strákar eru farnir að þurfa rislyf um tvítugt, og skiptast á nektarmyndum af stelpum eins og fótboltaspjöldum og eru sífellt fleiri ungar konur sem greina frá kynferðislegu ofbeldi sem þær hafa orðið fyrir. Ung kona sem vill ekki koma fram undir nafni vegna aðstæðna sinna segir algengt að krakkar hafi sent nektarmyndir af sér í grunnskóla.

Sjá einnig: Sífellt fleiri greina frá kynferðisofbeldi á unglingsárum

„Það gerðu það bara allir og mikið var verið að senda myndbönd af sér af gera eitthvað og ég og vinkonur mínar fengum líka oft typpamyndir án þess að hafa beðið um það að fyrra bragði,“ segir unga konan.

Oftast fóru samskiptin fram gegnum Snapchat og voru krakkarnir búnir að finna út hvernig hægt væri að vista efnið án þess að sendandinn vissi af því.

„Stelpur voru oft að senda strákum sem þær treystu myndir af sér að snerta sig eða dansa og þeir gátu vistað myndirnar og sent öllum.“

Oft hafi stelpurnar skammast sín mikið og verið heima  en það hafi gengið yfir því yfirleitt komu upp ný mál.

„Stundum melduðu stelpurnar sig veikar af því það var myndband af þeim í umferð en svo bara viku seinna var komið upp nýtt mál, þetta var svo oft það var nýtt mál í hverri viku“

Eins og verkefni hjá strákum að fá sendar myndir

Hún segir að stelpurnar hafi verið undir miklum þrýstingi að senda af sér myndir.

„Ef þú sendir ekki myndir varstu leiðinleg eða einskis virði. Það var tuðað eða maður niðurlægður fyrir að vilja ekki senda eða farið í að vera ógeðslega næs. Það var stundum eins og ákveðið verkefni hjá vissum strákum að fá sendar myndir.“

Hún segir að strákarnir hafi líka sent myndir af sér.

„Þeir voru þá að snerta sig, eða fróa sér eða bara að senda myndir af typpinu af sér.“

Hún var fimmtán ára þegar hún lenti hún í stafræðnu kynferðisofbeldi á netinu þegar sá sem hún spjallaði við bað hana að sýna á sér brjóstin.

„Ég var farin að treysta honum og hugsaði, ég þekki hann ekki hann er ekki að fara senda myndina neitt þannig að ég geri það.“

Var logandi hrædd

Hún ætlaði þá að ljúka samtalinu og fara að sofa.

„Hann sagði þá að ég væri ekki að fara að sofa heldur ætti ég að hlýða annars færu myndirnar af mér um allt internet.“

Henni tókst að hafa samband við frænda sinn og lét mömmu sína vita áður en málið þróaðist lengra. Hún eyddi sér út af öllum samfélagsmiðlum og var logandi hrædd lengi.

Hún telur jafnalgengt í dag að krakkar sendi nektarmyndir sín á milli og eigi erfitt með að viðurkenna það fyrir þeim eldri.

„Það er vont að þurfa viðurkenna það að maður er kjáni.“

Sjá má lengri útgáfu af viðtalinu í spilaranum hér að neðan.