Dular­fulla hunda­veikin: Fólk sem kemur frá Noregi gæti ítrustu var­kárni

Matvælastofnun hefur beint þeim tilmælum til fólks sem er að koma frá Noregi að gæta ítrustu varkárni til að koma í veg fyrir að sjúkdómur í hundum þar í landi berist hingað til lands. Smitið sem hefur lýst sér í blóðugum uppköstum og niðurgangi, hefur valdið bráðum dauða tuga hunda þrátt fyrir meðhöndlun.

Í tilkynningu frá Matvælastofnun segir að fólk sem hafi verið í mikilli snertingu við veika hunda eða verið á svæðum þar sem mörg tilfelli hafa greinst sé bent á að skipta um fatnað og þrífa og sóttheinsa skófatnað fyrir komu.

„Bann við innflutningi hunda frá Noregi sem Matvælastofnun setti 6. september mun vera áfram í gildi um óákveðinn tíma. Stofnunin fylgist áfram með þróuninni, tíðni nýrra tilfella, dreifingu og þeirri greiningarvinnu á ástæðu og uppruna smits, sem unnið er að af miklu kappi í Noregi.

Bannið verður endurskoðað þegar ástæða veikindanna og uppruni liggja fyrir eða tíðni tilfella fellur,“ segir í tilkynningunni frá Matvælastofnun.