Barcelona vill fá Martínez

Roberto Martínez, þjálfari belgíska landsliðsins, þykir líklegur til að taka við Barcelona verði knattspyrnustjóri liðsins, Ernesto Valverde, látinn taka pokann sinn.

Valverde gerði Barcelona að Spánarmeisturum annað árið í röð en liðið tapaði fyrir Valencia í úrslitaleik spænsku bikarkeppninnar og féll úr leik fyrir Liverpool í undanúrslitum Meistaradeildar Evrópu þrátt fyrir að hafa unnið fyrri leikinn, 3-0. Barcelona kastaði einnig frá sér þriggja marka forystu gegn Roma í 8-liða úrslitum Meistaradeildarinnar í fyrra.

Útvarpsstöðin RAC1 í Katalóníu greindi frá því að staða Valverdes sé ótrygg og Barcelona renni hýru auga til Martínez sem hefur þjálfað belgíska landsliðið síðan 2016.

Undir hans stjórn enduðu Belgar í 3. sæti á HM síðasta sumar sem er besti árangur þeirra á heimsmeistaramóti frá upphafi.

Martínez, sem er frá Katalóníu, stýrði áður Swansea City, Wigan Athletic og Everton á Englandi. Hann gerði Wigan að bikarmeisturum 2013.

Forráðamenn Barcelona hafa sýnt Valverde stuðning í fjölmiðlum en þeir ku vilja fá stjóra sem er harðari á æfingasvæðinu og spilar skemmtilegri fótbolta.