Höfðu hendur í hári innbrotsþjófa í Kópavogi með því að rekja fótspor þeirra

Tveir innbrotsþjófar voru handteknir í Kópavogi á laugardag eftir að tilkynnt var um innbrot í nýbyggingu í bænum. Á vettvangi og í nágrenni hans var ekki á miklu að byggja og þjófarnir hvergi sjáanlegir, en þó mátti sjá einhver skóför og hjólför að auki.

Það var þó nóg til þess að lögreglumenn, sem sinntu útkallinu, komust á sporið, en það leiddi þá að íbúð annars staðar í bænum. Þar fyrir utan stóð bifreið, sem hafði geyma þýfið, en í íbúðinni voru tveir menn, annar á þrítugsaldri og hinn á fimmtugsaldri, og voru báðir handteknir í þágu rannsóknar málsins.

Annar þeirra, húsráðandinn, var sakleysið uppmálað þegar spurt var út í innbrotið og hvort hann hann hefði eitthvað misjafnt að geyma á heimilinu. Ekki reyndust svör hans sannleikanum samkvæm því í íbúðinni fannst talvert af fíkniefnum, sem lögreglan lagði hald á.

Mennirnir játuðu báðir sök við yfirheyrslu á lögreglustöð, en að því loknu var hinum stolnu munum komið aftur í réttar hendur. Mestmegnis voru þetta verkfæri, en þjófnaðurinn er sagður mjög bagalegur fyrir eigandann sem hefði lítið komist áfram við framkvæmdirnar án þeirra.