Modric verður ekki kærður fyrir meinsæri

Besti knattspyrnumaður heims á þessu ári, Króatinn Luka Modric, verður ekki kærður fyrir meinsæri eins og búist var við.

Dómstóll í Zagreb vísaði máli Modric frá í dag en hann var sakaður um að hafa borið ljúgvitni í máli hins alræmda Zdravko Mamic.

Mamic réði öllu hjá Dinamo Zagreb er Modric var þar. Mamic og þrír stjórnarmenn Zagreb voru allir sakfelldir fyrir fjárdrátt. Mamic flúði til Bosníu áður en hægt var að handtaka hann.

Dómstóllinn sagði að þar sem ekki öll kurl væru komin til grafar í máli Dinamo, og enn væru áfrýjanir í gangi, væri engin ástæða til þess að kæra Modric.

Saksóknari getur áfrýjað þessum úrskurði og ekki víst hvort hann geri það á þessari stundu.