Ætla að nýta diplómatísku miðana á leiki Íslands

Fréttin að neðan var aprílgabb Vísis árið 2018.



Miðar þeir sem ráðamenn Íslands og aðilar innan stjórnsýslunnar munu ekki nýta á leiki Íslands á HM í knattspyrnu í Rússlandi í sumar koma heppnum Íslendingum að góðum notum. Utanríkisráðuneytið hefur gefið Tólfunni, stuðningsmannahópi íslenska landsliðsins miðana sem hefur ákveðið að láta þá ganga til almennings. 

Til stóð að ráðamenn Íslands, þar með taldir menntamálaráðherra, utanríkisráðherra, forsætisráðherra auk forseta Íslands og fylgdarliði, yrðu viðstaddir leiki Íslands, einn eða fleiri á HM í sumar.

Á mánudaginn tilkynnti hins vegar Guðlaugur Þór Þórðarson utanríkisráðherra að íslensk stjórnvöld hefðu frestað um óákveðinn tíma öllum tvíhliða fundum með rússneskum ráðamönnum og háttsettum embættismönnum. Og að íslenskir ráðamenn myndu ekki mæta á leikina.

Ábyrg hegðun áskilin

Benjamín Hallbjörnsson, formaður Tólfunnar og betur þekktur sem Benni bongó, segir mikilvægt að Ísland eigi sem flesta fulltrúa á leikjum landsliðsins í Rússlandi.

Því hafi Tólfan ákveðið að koma miðunum í hendur íslenskra stuðningsmanna en með ákveðnum skilyrðum þó.

Þeir sem fá miðana skuldbinda sig til að dvelja á hóteli með öðrum diplómötum í Moskvu í tvær nætur fyrir leik og eftir.

Þeir þurfa að vera snyrtilega til fara og þurfa að geta talað ensku.

Miðar, gisting og ferðalög innan Rússlands fylgja miðunum en fólk þarf að koma sér sjálft til Rússlands og aftur heim.

Miðunum fylgir ábyrgð

„Fólk verður að gera sér fulla grein fyrir að miðunum fylgir mikil ábyrgð,“ segir Benni í samtali við Vísi.

Það hafi alls ekki verið sjálfgefið að koma miðunum í hendur almennings. En, í ljósi jákvæðrar ímyndar íslenskra stuðningsmanna, sem segja má að hafi öðlast heimsfrægð eftir Evrópumótið í Frakklandi sumarið 2016, sé litið á þetta sem tækifæri.

Fararstjóri mun fylgja hópnum sérstaklega og aðstoða eftir þörfum. Benni brýnir þörfina á snyrtilegum klæðnaði um leið og hann minnir á að ölvun geti ógilt miðann, ef svo má segja.

„Það er náttúrulega ekki í boði að okkar fulltrúar séu ölvaðir í VIP stúkunni innan um ráðafólk annarra þjóða,“ segir Benni.

Hann og félagar hans í Tólfunni verða í lykilhlutverki meðal almennra stuðningsmanna í stúkunni og láta því öðrum stuðningsmönnum eftir diplómatísku miðana.

Þarf að ganga frá þessu hratt og örugglega

Tólfan þarf að skila nafnalista til yfirvalda í síðasta lagi á þriðjudaginn. Hafa þarf hraðar hendur og ætla Benni og félagar í Tólfunni að taka á móti áhugasömum á Ölveri í Glæsibæ klukkan 12 á hádegi í dag.

Þar fer fram stutt viðtal auk þess sem skrifa þarf undir yfirlýsingu þess efnis að viðkomandi skilji þá ábyrgð sem diplómatísku miðunum fylgir og gangist við henni. 

„Við hvetjum fólk til að mæta stundvíslega því við viljum klára þetta hratt en örugglega,“ segir Benni.

Á morgun verða bakgrunnsupplýsingar umsækjenda kannaðar og í framhaldinu haft samband við þá sem miðana hljóta. Til stendur að halda stutt námskeið fyrir þá sem fara með þessum hætti til Rússlands til að fyrirbyggja allan misskilning sem upp gæti komið.